本文重點
潮流講創意，香港人對遊行示威，熱情一直冇減退，不過招數開始老化，就算近期嘅新興動作掟蕉、爆粗，亦都暴烈有餘，新意不足，香港示威文化要可持續發展落去，真係要諗吓計。新任可持續發展委員會主席陳智思（Bernard），尋日談及立法會添馬艦新大樓設計時，提出一個嶄新意念，建議立法會外豎立一幅牆，專供人噴畫塗鴉，激發創意。咦，大學有民主牆，Bernard呢幅一於叫「民憤牆」啦，市民有乜不滿，大可塗鴉發洩，呢個諗法雖然前衞咗啲，不過都唔係無得諗喎。
回歸以嚟，立法會成為港人嘅抗議舞台，每逢特首施政報告、答問大會同預算案公布當日，都有一批批市民手持橫額抗議，肯花心思嘅示威者，會帶埋面具、雞蛋同魚眼一類嘅小道具同行，初時都幾新鮮，不過慢慢變成因循，再難吸引市民嘅眼球。三年後添馬艦立法會新大樓落成，示威區面積大咗，示威文化唔知有冇機會亦與時並進？大家不妨思索一下Bernard嘅說話。
立法會添馬艦新大樓正在設計階段，大樓擺放乜嘢藝術品，係焦點之一，Bernard大學時代主修藝術，依家擔任古物古蹟委員會主席等公職，又係前立法會議員，佢講呢個問題，都算半個權威。Bernard話，最緊要秉持支持本地藝術創作原則，香港有錢佬應該多啲買本地藝術家嘅作品，鼓勵藝術創作，立法會作為民意機關，最好都可以響應吓啦。
被問到點睇外國時興嘅街頭塗鴉創作，一向思想開明嘅Bernard，即刻大表贊同，仲提出大膽意念，話立法會新大樓不妨考慮喺外面豎立一幅白牆，畀市民噴畫創作，激發創意，佢仲建議，呢幅牆每月清洗一次，咁可以循環再用，成為激發市民源源創意新地標。Bernard呢個建議，認真夠創意！
最怕民怨爆燈 不敷應用
大學有民主牆，畀學生有園地直抒己見，對校方管理層有任何不滿，都可直抒胸臆，成為校內嘅民主象徵。立法會係民意代表機關，整幅牆被表達意見，抒發情緒，真係夠晒貼題，又夠創意，最怕係市民對政府嘅怨憤好似雪球咁愈滾愈大，幅牆唔夠兩日就被宣洩不滿嘅市民畫滿晒，到時難為立法會職員洗牆洗到手軟咋。