呢排春雨綿綿，尋日港鐵舉行一年一度競步賽都幾乎要腰斬，好在天公最後作美，十點幾收晒雨，令重頭戲嘅「港鐵主席邀請賽」得以上演，港鐵主席錢果豐帶住三十九個工商界領袖及名人，喺中環遮打道競步一公里鬥一番，結果立法會議員隊全軍覆沒三甲不入，僅得立法會議員謝偉俊（Paul）以中游名次首個衝線，Paul認叻話，中學時係網球校隊，所以論跑得，立法會冇人及得佢喎。
名人晒裝束肌肉
卓妮尋日都加入競步行列，參賽名人未開跑前先賣弄吓一身裝束，近日捲入緋聞嘅Paul以細咗一個碼嘅短袖Ｔ恤加單車褲示人，擺明Show胸肌；有「公職王」之稱嘅陳智思則着雞翼袖上衫，大晒肌肉。大會要求參賽者喺中環兜個圈，結果由醫學會副會長周伯展勝出、信置主席黃志祥公子黃永光則冧莊跑第二、而陳智思就跑第四，力保上屆嘅席位。
一眾議員跑到索晒氣，只有Paul最快衝線，佢牙擦擦話中學時期曾經跟隨「九龍華仁」班師兄弟稱霸學界網球賽十三年，至今雄風仍在，同場嘅女將陳淑莊都自爆自己係長跑好手，不過已經係八年前嘅事，佢曾經參加港島徑環島行，一口氣跑七公里，可惜後來投身政界後太忙，長氣不再。
卓妮轉頭見到醫管局主席胡定旭，肥胡跑第三十幾名，但笑容好似執金咁開心，原來係因為唔使包尾，心願已償喎。肥胡又主動介紹身上一條長褲，話呢條褲曾經跟過佢去行苗圃行動，好處係畀水淋濕或者沾到泥濘都好快乾，幫助佢出水能跳，入水能游，認真爽。
涂謹申跑到Ｏ晒嘴
競步一公里其實全程只需五分幾鐘，難度屬BB級，不過平時喺立法會質詢政府時中氣十足嘅議員涂謹申，竟然跑到Ｏ晒嘴、伸晒脷，狀甚痛苦。
阿涂表示，自己都唔多滿意表現，擰晒頭話平日埋頭埋腦做嘢，搞到連做運動都冇時間，跑起步上嚟咪索晒氣。阿涂話晒已經步入中年，再唔操Fit吓，好易老喎。
卓妮