雷曼爆煲已經大半年，財經事務及庫務局常任秘書長區璟智表示前排去咗英國取經，知道當地有個叫「金融申訴專員」，港府打算有樣學樣，研究設立獨立於金管局及證監會嘅財經事務申訴專員制度，而且會喺年底展開諮詢添。
申訴專員喎，聽個名就知勁啦！香港早就有個申訴專員公署，周不時發炮狂轟政府部門嘅失職行為，幾威呀，幾咁有牙力呀，幾咁大快人心呀！
可惜，此專員唔同彼專員，財經事務申訴專員睇嚟係威係勢，成隻猛虎咁，但其實係冇牙老虎，嚇鬼就得。
原來，所謂財經事務申訴專員，只不過係以調解同埋仲裁為主，每宗投訴嘅申索金額唔單止有上限，而且冇權協助或直接代表小投資者興訟，甚至冇權強制金融機構執行其裁決，你話喇，咁嘅申訴專員有咩用吖！
唔怪得連區璟智自己都說服唔到自己，佢話設立申訴制度唔可以完全解決金融規管漏洞，只可以協助投資者處理投訴和調解，令監管機構可以更加集中規管嘅工作。
喂，收投訴信咁簡單嘅事，使乜要特登設立一個衙門做？求其放個紙皮盒喺度咪得囉！依家香港有幾千萬樣嘢唔掂，如果乜都要設立申訴專員，咁就真係可以創造好多就業機會咯。
嗱，周街都係發霉藥、過期藥、冇牌藥，當然要開番個藥物申訴專員啦；蘇丹紅蛋、三聚氰胺奶、走私菜長驅直入，更加要整個食物申訴專員啦。仲有，本港公廁出晒名污糟邋遢，臭氣熏天，唔通又要設個公廁申訴專員？
講到底，家陣最弊係金融體系毫無監管，金管局及證監會扯貓尾，鬥卸責，財金官員見到漏洞又唔堵塞，齋噏當秘笈，吹水當監管，乜都唔做，只係識得事後孔明，再整多十個八個申訴專員出嚟又有乜用吖。
嗱嗱嗱，金管局總裁任志剛講到自己係先知先覺，話一早已經將雷曼迷債嘅風險評級調高。問題係，佢明知風險高都唔加強監管，亦冇提醒投資者，咁算唔算失職呢？
更好笑嘅係，舊年金融海嘯冚冚聲打到嚟嗰時，有人問財經事務及庫務局局長陳家強，金融風暴會唔會重現呀，你估佢點答呀？佢話喎，完全睇唔到金融風暴重現嘅迹象。咁陳局長又真係幾夠眼光喎，因為呢劑的而且確唔係「風暴」而係「海嘯」吖嘛。
雷曼兄弟爆煲，呢位人稱傻強嘅陳局長至知道天下間有迷你債券呢樣嘢嘅存在。可惜佢唔幫手都算啦，仲涼薄到嘲笑買雷曼迷你債券嘅人，最大嘅問題係唔知道風險。
計功夫茶話齋，香港金融體系最大嘅問題，就係負責監管金融機構嘅廢官唔知道風險就真，所以小投資者都係自求多福，好過信錯政府，最後輸到攤攤腰嗰時，被迫排長龍搵冇牙老虎嘅財經事務申訴專員訴苦吖，係咪？