本文重點
前身為海域化工嘅香港資源（2882）最近豬籠入水，自從「四叔」李兆基同已故女富豪龔如心名下嘅華懋集團先後入局，股價升到「嘭嘭聲」，主席黃英豪（Kennedy）個荷包肥過肥仔水，為免身形同步膨脹，Kennedy最近特登請嚟健身教練，操弗自己。咪睇Kennedy有張Baby Face，臥舉推胸舉得起一百三十磅鐵餅，依家佢對「胸肌」，似足香港資源嘅股價咁堅挺。
民安隊體測無難度
身兼全國政協委員嘅Kennedy，係慈善家黃笏南之孫，屬近年嘅紅色新貴，近期代表作係一手搞翻生海域化工，市場傳為佳話。不過，佢嘅另一個「神秘」身份，似乎唔多人熟悉，就係民安隊副處長。Kennedy話，自己九八年入民安隊，○一年升副處長，所以咁多年嚟對自己體能從未鬆懈。佢話民安隊高層唔一定要過體能測試，但係佢次次都去考，務求令自己嘅體能維持喺最佳狀態，好似掌上壓、Sit Up、青蛙跳同埋喺規定時間內跑二點四公里咁，對佢嚟講都冇難度。
所謂財多身子弱，Kennedy最近豬籠入水，真係要小心啲，家住山頂、屋企備有私人GYM房嘅佢，依家Keep住每星期行四日山、玩一至兩日健身。Kennedy平日文質彬彬，原來禾稈冚珍珠，西裝下面有一對堅挺胸肌同老鼠仔。Kennedy話，玩GYM都有十幾年，最近請埋私人教練，喺名人聚腳地深灣遊艇俱樂部秘密練兵。卓妮聽完佢嘅練兵過程，發覺佢最犀利係臥舉推胸，成百磅嘅鐵餅都只係當熱身，最重舉到百三磅，仲重過卓妮，真係人不可貌相噃！
卓妮