「黑仔」台長林超英唔按章法出牌，臨走前寄語接班人唔使學佢，但署任天文台台長李本瀅仍然有樣學樣，延續台長網誌，尋日處男下海首作，一開腔就話準備「信封」。唔係呀？個位都未坐暖就派大信封？非也！信封就係信封，只係佢以前做時，黑英派信封畀佢，裏面全部都係啲工作指示嚟啫；依家換莊，咪輪到佢搞囉！可能啱啱坐上呢個三煞位，李台長好老實話，喺準備呢啲信封時，好多人都畀意見佢，但要喺眾多岔路中取捨，有時都好困難。
相信大家都領教過黑英講嘢寸寸貢、尤其畀市民鬧測錯風仲出嚟死撐個樣，但李台長喺網誌度竟先認衰話，雖然近年氣象同地球物理科技不斷進步，儘管天文台一般可以預報未來數天嘅氣溫，但要預測未來幾小時雨量仍然好難。
李台長仲話，現代嘅數值模式可以計算出一個熱帶氣旋喺未來數日大致移動方向，但難以喺數小時前確切預知幾時同邊度登陸，所以點樣操作熱帶氣旋警報以達到市民期望，仍然係一個考驗！所謂天有不測之風雲，李台長依家仲要事先張揚話天文台未必測得咁快咁準；即係報定案，博市民鬧少啲囉！