本文重點
跑馬地馬場前晚相當墟冚同熱鬧。卓妮想講嘅唔係有咩名人拉頭馬，而係馬會主席陳祖澤（John）嘅「六六無窮」生日會。阿John前日六十六歲牛一，馬會為佢度身訂造一個既愉快又難忘嘅生日會，一班馬會大董及管理層攜眷撐場外，仲預備咗一個四呎高嘅巨型禮物箱，內裏載住神秘禮物，大家估吓係乜？
陳太親吻 場面溫馨
卓妮去咗生日會湊熱鬧，見到多位董事及管理層人員，包括全國人大常委范徐麗泰、葉錫安夫婦、葉澍堃夫婦、李國棟夫婦、陳南祿夫婦、郭志桁夫婦及周永健夫婦等，周永健更加帶埋囝囝出席見世面添！管理層方面就有慈善事務執行總監饒恩培及發展事務執行總監麥建華等出席，場面非常熱鬧，阿John同太太就不停答謝賓客畀面到場。
生日會儀式開始時，馬會職員推出一個四呎高嘅巨型禮物箱，卓妮仲以為會跳出一個兔女郎向阿John拜大壽，但當阿John打開個盒蓋時，才發現原來係捧住一碟壽包嘅財神。其後阿John切壽包和開香檳，陳太就親吻阿John以示祝賀，場面溫馨。問阿John有乜生日願望？佢就祝願人人贏大錢，香港經濟暢旺，馬會繼續為市民做多啲好事！
阿John仲好風趣話，今年係第一次度過失業、無收入嘅生日，事關去年退休離開九巴時，佢仲擔心今年生日無着落，好彩仲有咁多人同佢慶祝，而且仲有壽包食添！不過，陳太就話丈夫有無收入都唔緊要，開心就得嘞，認真係好有默契嘅恩愛夫妻。至於送乜嘢生日禮物，陳太話係佢哋兩公婆之間嘅秘密喎！
董事撐場 再度連任？
阿John○六年九月當選為馬會主席，到今年九月已經做咗三年，又要面對改選。但馬會無規定正、副主席可以連任幾多次，睇番阿John呢幾年嘅表現，加上前晚生日咁多董事撐場，莫非暗示佢眾望所歸，再度連任？
卓妮