政情：議員諧音爆粗嗌Poor Guy

前日立法會主席透過鑽《議事規則》嘅空子，裁定「×街」一詞係「非議會言語」，以後都唔可以再喺立法會內使用，間接迴避咗「×街」、「狗噏」同「條條fing」算唔算粗口嘅爭論。

不過你有張良計，我有過牆梯。有社民連議員尋日喺立法會辯論預算案時，就特登揀以普通話發言，破口大罵煲呔曾、財政司司長鬍鬚曾同整個特區政府「不該」，用「不該」嘅普通話諧音暗鬧佢哋「×街」。期間佢仲送多一句英文「Poor Guy」，字面就係可憐人咁解，意謂煲呔曾、鬍鬚曾呢班高官，令市民變成「Poor Guy」，諧音又係話佢哋「×街」。

最可惜係當時鬍鬚曾咁啱行開咗去食飯，未能即場「欣賞」呢位議員嘅創意，餘下三名問責局長孫明揚、李少光同陳家強，又好似借咗聾耳陳隻耳咁扮聽唔到，冇向主席投訴。可能佢哋都心知成件事根本係煲呔曾理虧在先，唔敢再狡辯「狗噏」。