為咗唔想教壞細路，功夫茶以ＰＫ代替。假設，有人ＰＫ，最正路梗係打九九九報警啦，召喚救護車到場施救。問題嚟嘞，白車會唔會死火呢？司機會唔會行錯㗎？至於去到醫院會唔會食錯藥、打錯針或者輸錯血，已經係另外一大堆驚險刺激懸疑詭秘嘅離奇謎團，功夫茶今日暫且按下不表。大家唔好心邪，「不表」唔係粗口，唔信可以問一問立法會嗰一班粗口專家。
講番救護車，前日發生一宗悲劇。有一位經營渠務工程嘅好爸爸，清晨未天光時分駕車至茶果嶺道途中懷疑心臟病發，失控直撞路邊貨車。消防處接報救人，好可惜，救護車遲咗五分鐘到場，好爸爸送院之後死亡。
白車因乜事遲大到呢？第一個原因，位置最近嘅藍田救護站平時夜間只有兩架白車駐守，當時啱啱都要執勤，消防處從對面海嘅柴灣調派另一架救護車去藍田頂更。第二個原因，「他來自柴灣」嗰一位救護車司機人生路不熟，趕去茶果嶺道嘅時候，曾經向電台查問：「喺邊？係咪三家村碼頭食海鮮嗰邊？」由於唔識路，終於就遲到。
呢嗱嗱嗱，世事往往就係咁禍不單行，尋日再發生多一宗悲劇。石硤尾白田邨有一名男子昏迷，救護車送佢入醫院期間，居然死火跪低，焗住轉車送院。左搞右搞，延誤八分鐘，昏迷男子性命垂危！
嘩，大佬！白車死火呢家嘢，唔係第一次㗎啦，因乜解究消防處仲未將老爺白車維修呀？另一個問題就係，嘩，大佬！消防處人手不足嘅毛病講咗Ｎ年㗎啦，因乜解究特區政府仲唔去增聘人手呀？
根據消防處救護員會所講，過去十年以來，救護服務需求增加百分之二十至三十，召援由以前嘅五十幾萬次，增加至七十幾萬次，之但係，人手淨係增加咗百分之二至三咁大把。消防處救護員會主席屈奇安認為，全港日間最少要增加一百架救護車當值，晚間要增加五十架。
講到呢度，功夫茶開始有少少認同粗口議員嘅尊貴意見，特區政府真係幾ＰＫ㗎。救護員明明唔夠人，救護車明明唔夠新，人有人做到踢晒腳，車有車行到甩晒轆，整鬼佢吖，孤寒成性嘅掌櫃高官居然唔去撥款改善，害到全港市民隨時ＰＫ失救！
講真，曾蔭權成日話要抗擊金融海嘯、創造就業機會，消防處增聘人手咪係最好嘅就業機會囉，好過經濟機遇委員會戇居居提議拆招牌刺激經濟吖。
有怪莫怪，眼見孤寒政府害死人，功夫茶忍無可忍，點都要執粗口議員口水尾講番句：福佳始終有你！