露股罅免費入場
從來男人要吸引女人，最直接係大騷肌肉，賣股罅真係第一次聽！唔使審，若然事件發生喺香港，必定會被囡囡話你變態。之不過喺邁阿密，當地男女出名熱情奔放，只要認為有需要，就會大大聲講出口，甚至親自參與。
今日介紹呢個派對就係最佳例子，派對名為「股惑肌佬」，入場男士唔一定要靚仔有型、一身肌肉，更毋須家財萬貫，但必定要有一條股罅，愈深不可測愈多女迷。大會話，只要閣下喺大門入場前，騷一騷條罅，就可免卻入場費，相反玩怕醜，就要正價買飛當睇騷！
好明顯，是次派對係針對一班愛「股惑」嘅Ladies，甚至一班同志耍樂，而為咗尊重對方，女士衣着會零舍疏爽，等男士們露得盡情一點，況且女士都要夠本錢勾引班麻甩佬，否則畀其他姊妹搶咗，當晚就要食自己喇！
男士出股惑
環境咁黑，究竟班女點睇呢？原來係靠手感，有玩家表示，要喺D場睇男人股罅根本無可能，所以一定要靠摸，而吧枱位置就係仔仔女女嘅集中地，男士只要對住吧枱微微彎身，好自然露出少少股罅，女士就明正言順睇嘢。
蒲友好肯定咁話，只要男人肯露就會有女願意埋身，除咗睇仲會出手摸，可惜男人就唔可以回敬對方，只可以笑住回應！蒲妹Mary就自言遇過不同類型嘅男人，仲每次出擊都有下文添，佢總結話：「較常見嘅『股男』會扮正經先請女士飲酒，之後就開始傾偈跳舞，呢類男人最受歡迎，起碼會畀時間雙方了解吓；至於急色嘅猛男就會借助其他朋友圍埋一齊，等女士無得走，製造機會畀兄弟睇，佢哋以為咁做女士一定冧，實情令女士好討厭。但最離譜嘅，必定係一埋身就攬住你條腰唔放，然後扮熱情拉你去跳辣身舞，仲要起勢抽水，真係Cheap爆！」
話說回頭，派對只係Sell吓麻甩佬股罅，但出奇地女人都好Happy，莫非真係咁好玩？參加者Lucy就話：「係女士無聊貪新鮮啫，一向以嚟派對單純賣弄女士性感，得男士着數，但依家講求平等，可惜男人冇嘢好露，咪露吓股罅囉，如果要佢哋轉身，相信就冇人會去喇！」
純粹玩仔
究竟呢種Party仲有咩可取之處，值得一搞再搞呢？搞手就解釋係同減壓有關。原來男人「行股惑」引誘女人，喺男人角度，唔再單靠樣貌同身家比較，只要自認夠Man夠狠就界到女，對一啲表演欲強嘅男仔確實吸引。但這可能只代表男人心聲，對女人嚟講，可以睇到班平日返工扮君子嘅大男人，搖身一變賣股罅迷惑女人，已經好過癮。就好似Lucy所講，派對中最受歡迎的反而係怕醜仔：「要識大隻佬，平日派對有好多，根本唔需要特意來參加，相反平日頭耷耷，連女都唔敢抬起頭睇嘅仔，我哋姊妹就最欣賞，每次見到佢哋面紅就會有快感，好想同佢哋有下文。」嘩，原來參加者都抱住玩仔心態入場，咁不如搞個專為電車男而設嘅派對，話唔定仲好搵呢！
撰文：祖