阿Paul謝偉俊係律師出身，又做過電台節目主持人，靠慣把口搵食，循旅遊界殺入立法會之後，議事堂發言絕對難唔到佢，不過，作為議會新丁嘅佢，每次發言前都會做足功課，唔會學似佢以前嘅競選招數咁，赤條條上陣。
所以，阿Paul尋日論盡議會同僚嘅發言表現時，提到從來都係睇住無字天書發言嘅師傅詹培忠時，一樣無面畀，直指詹Sir「好懶」。不過，阿Paul講講吓亦兜番轉頭，讚詹Sir聰明，唔使睇稿，發言都係咁精彩。靠把口搵食嘅人，果然識講嘢。
阿Paul入咗議會之後，對旅遊界鞭策不遺餘力，佢尋日直斥旅遊業議會黑箱作業，阿Paul話，年前中央電視台踢爆香港黑店劏客之後，旅遊業議會以十二票對十一票，通過將旅客購物退款期由十四日延長至六個月，但係按法例，議會其實要以三分之二大多數票通過，先至有效，即係話賠咗錢嘅商戶，隨時可以告番旅遊業議會轉頭。阿Paul又好唔滿意旅議會代收印花稅但又不必受審計署監管，總之佢磨拳擦掌，誓要改革旅議會。