本文重點
曾經為副局長同政治助理招聘舉行「揀蟀會」嘅智經研究中心，尋日舉辦成立三周年午餐會，傳媒自然好關心會否有大批問責局長到場「揀蟀」，以及嗰啲曾經參加過智經「揀蟀會」嘅副局同政助，會唔會前來捧場答謝智經嘅知遇之恩。
不過結果就令人大失所望，唔計擔任主講嘉賓嘅財政司司長鬍鬚曾，三司十二局問責官員僅得勞工及福利局局長張建宗到場，而且佢全程表現低調，唔似有心嚟「揀蟀」。我哋問智經主席胡定旭嚟緊仲會唔會搞「揀蟀會」，佢笑言呢個係假設性問題。睇嚟政府已經放棄咗喺短期內進行新一輪招聘。
避嫌免外界閒話
至於副局同政助方面，傳媒所見亦只得做過智經研究員嘅教育局副局長陳維安同保安局政治助理盧奕基到場，與之前同為智庫組織嘅三十會舉辦五周年酒會，十七名副局同政助幾乎到齊嘅盛況大相逕庭。相信佢哋今次係想刻意避嫌，以免畀外界話佢哋要投桃報李。