政情：煲呔曾漠視民意冇心肝

逢星期二舉行嘅行政會議，照例有市民喺政府總部門外請願，尋日開會，特別嘅係有一位市民植太喺會前向煲呔曾請願時，遞上一張佢向煲呔曾遞信請願嘅相片，控訴煲呔曾應承佢跟進，又冇咗下文。煲呔曾見到自己張相，嚇咗一跳，問：「乜我同你見過面咩？」接咗封信，就行咗去嘞。

植太手持嘅同煲呔曾嘅合照，證明曾經向佢請願。

煲呔曾接請願信，一時口快話唔記得見過植太。

西區居民關注港鐵通風口

植太原來代表由港島西區居民組成嘅西港島線居民關注組，關注將來港鐵起大學站時，通風口對環境造成嘅影響，希望煲呔曾可以幫吓佢哋。植太話，去年八月廿八日，煲呔曾就施政報告到禮頓山社區會堂出席諮詢會，聲稱聽取市民嘅意見，植太向佢遞交請願信，請佢關注吓通風口嘅問題，當時煲呔曾口爽爽，冇經過大腦就應承幫佢跟進，但係事隔超過半年，冇咗下文，尋日再請願，煲呔曾竟然送上一句：「乜我同你見過面咩？」唔單止冇心肝，仲完全冇顧及對方嘅感受。

其實煲呔曾對市民無心肝已經有前科，○七年十月，又係開行會之前，又係喺政府總部門外，佢遇到一班要求增加生果金嘅老人家，當時煲呔曾見避無可避，於是乎走到一位婆婆面前，語出驚人咁問婆婆點解唔去攞綜援。不過好有骨氣嘅婆婆講明，佢希望自力更生唔想靠人，頓時令到煲呔曾汗顏，之後老羞成怒嘅煲呔曾仲呼喝一位伯伯，叫阿伯唔好咁大聲，原因係太大聲佢唔鍾意聽。估唔到事隔年幾之後，煲呔曾嘅冇心肝同涼薄，又再重演。

作為政府之首，煲呔曾唔係應該視市民如自己嘅仔女，視自己為市民之父母咩？但係佢對市民冇心肝又冇耐性，佢點樣可以設身處地，去為市民設想？煲呔曾曾經聲稱自己嘅職業係政治家，但係佢連做好一個父母官嘅基本條件都無，佢嘅民望狂瀉不止，除咗佢治港嘅能力唔掂之外，冇心肝都一定係一個原因囉。