退黨三人組自從跟自由黨決裂後，兩派人各有各發展，昔日攬頭攬頸場面不再，不過世事無絕對，3L成員蘇菲梁劉柔芬尋日喺中環搞新書簽名會，前自由黨主席田北俊打破嫌隙撐場，同蘇菲攬頭攬頸合照，打破不和傳聞，睇嚟時間真係可以修補裂痕喎！
蘇菲推出處女作《幼兒食譜》，除咗有老公梁孔德及兩位公子撐場外，唔少立法會議員及城中名媛都賞面買本書先睹為快。卓妮所見，掃書最多係行會成員劉皇發，一開波就買咗十本，話要送畀千金同新抱，實行谷肥啲孫仔。
出席新書簽名會
數到最矚目嘉賓就非田少莫屬，令蘇菲又驚又喜，笑言咁嘅場面真係好難得。田少好耐冇見蘇菲，不忘搞吓氣氛話：「你咁好嘢嘅，識得作書，我喺立法會嘅發言稿都係搵人幫我寫咋。」蘇菲不甘示弱話：「我唔係作㗎，係寫書至真」。講到食經，田少話「識食唔識煮」，至愛叉燒。
發展局局長林鄭月娥自爆好鍾意煮嘢食，撚手小菜係炒牛肉，阿仔都話頂呱呱。
卓妮轉頭見到一位稀客，佢就係長實主席李嘉誠新抱王儷橋，李太一向深居簡出，不過Auntie蘇菲話晒睇住佢大，點都要畀面。李太話，閒來會喺屋企煮吓家常便飯，講到買餸就會揀有機食品，等仔女食得健康啲。
咁啱得咁蹺，滙豐亞太區主席鄭海泉嘅太太都崇尚健康食品，鄭太話煮餸時會將中醫嘅養生概念加入食譜中，唔同季節就食唔同食物，好似呢排天氣乍暖還寒，就將西洋菜攪碎拌成湯畀老公飲，相當滋陰。
入廚急救有秘方
講番蘇菲出食譜，佢話出書念頭來自屋企兩個孫仔，平日花唔少心思同菲傭Lita鑽研啱ＢＢ食嘅健康菜式，日子有功累積唔少秘笈，索性將佢公諸同好。咪睇蘇菲十指纖纖，佢自爆入廚時不時畀滾水或滾油彈到玉手，好彩佢有個急救秘方，就係將受傷嘅手放入鷹粟粉入面敷一陣，咁就乜事都冇嘞。
卓妮