BMW X5注入科幻貴氣好玩

車體加大更具台型

好多人見到新一代X5，都會覺得乜好似大部咗咁多嘅。事實上真係有數據支持，除了長闊高增至4,922（+36）×2,004（+66）×1,745（+19）毫米外，還大幅加大進氣口面積，望落又真係幾有台型。首批到港的X5有xDrive40iA五座位xLine及M Sport Edition，後者是今次試駕的版本，設計強調運動化，窗框及行李架都用上高光黑色，還有M Sport車身套件、20吋輕合金輪圈及升級M Sport Brake，鍾意跑格賣相嘅車友應會相當受落！

排氣尾管採用方形設計，並加上鍍鉻邊框。	全景天窗可升級至「Sky Lounge」，逾1.5萬粒光源在夜間可營造出浪漫的星光。	車廂設計及用料都堪稱歷代最豪，充滿奢華氣息。

豪氣裝潢奢華享受

車廂具備的語音「助理」及手勢控制，充滿科技感，還糅合了奢華Feel，iDrive控制器、引擎啟動按鍵及音量控制按鈕皆用上全手工水晶打磨技術製造，還有好似藝術品咁樣嘅水晶波棍，如此豪氣的裝潢，過往未曾在任何一代X5見過。另外，新X5標準配備的全景天窗面積比上代加大30%，並提供「Sky Lounge」作選配，逾1.5萬粒光源在夜間可發出點點星光，而且可跟隨車內氣氛燈轉色，營造出浪漫氣氛。 對舒適有高要求的客人，更可為前座加入按摩功能，進一步提高豪華享受。

前後輪距增至2,975mm（+42mm），帶來更闊落乘坐空間。	尾箱容量可在650至1,860公升間靈活調配，非常實用。	波箱整合可發光的「X」字樣作點綴，盡顯華麗氣派。

車匙顯示座駕資訊

作為SAV（Sport Activity Vehicle）中的大哥，尾箱在五座設定下也有650公升的空間，擺3個大篋都不成問題，有需要時還可扳平後座增至1,860公升。為方便存放行李，分上下兩截打開的尾門不僅設有感應打開功能，甚至可將離地距降低40毫米，個子矮小的用家都可輕鬆提取物品。另一方面，今次X5更首次配置溫度控制杯架，可為兩杯飲品獨立提供30至55度的恒溫功能，中控台下的儲物格另設無線充電板，毋須插線便可為智能電話充電。BMW Display Key亦首次出現在X5上，車匙可即時提供各種重要汽車資訊，當司機離開汽車後，亦可以檢查汽車的燃油量、中央鎖及車窗等狀態，甚至在車外預先開啟通風系統。成部車多嘢玩到好似玩具咁，仲有成340匹馬力，係咪好想擁有呢？

首次出現在X5的BMW Display Key，可助車主掌握重要的汽車資訊。	降低離地距後，提存行李更加輕鬆。	引擎為3.0公升直六缸渦輪增壓，馬力達到340匹。

開句聲「助理」控制設備

X5已發展至第4代，車上配置最新的「BMW Live Cockpit Professional」，當中包括12.3吋電子儀錶板及中央顯示屏，用戶可自行設定常用介面，而在導航顯示中，更可顯示尚餘目的地距離及到達時間，讓駕駛者更有預算。不過筆者最喜愛的功能，卻是首次應用到X5的虛擬個人助理，可透過語音來控制車內的設備。「助理」的名字預設為「BMW」（你可以幫佢改過個名），只要說出「Hey BMW」便可喚醒系統，接着說「返屋企」，導航系統便會顯示回家的行車路線，唔使停低車慢慢設定。「助理」仲可協助調校冷氣溫度及娛樂系統，甚至查詢車輛狀態。其中一個幾特別的功能是，當駕駛者說出「我好攰」，部車會透過調節氣氛燈、音樂及溫度，令駕駛者「醒神」一啲。

新X5配置了最新的智慧型聲控個人助理，靠把聲已可控制多種設備。

錶板為12.3吋數碼屏幕，設計帶科幻感。

規格表

車型：五門五座位SAV

引擎：直六BMW TwinPower Turbo

容積：2,998c.c.

最大馬力：340hp/5,500~6,500rpm

最大扭力：450Nm/1,500~5,200rpm

傳動：八前速Sport自動波

0~100km/h：5.5秒

油耗：8.5~8.8L/100km

車身體積：4,922×2,004×1,745mm（長×闊×高）

撰文：鄭浩文

攝影：蔡浩文

查詢電話：3129 9000（BMW HK）