BRABUS 700 Widestar「飛」一般越野

閃耀摩納哥遊艇展

剛過去的摩納哥遊艇展上，出現一件與遊艇毫無關係，卻搶了不少風頭的展品，這就是BRABUS 700 Widestar。點會喺度出現？去得呢個遊艇展的人，很多都是富豪級，幾百萬架車對佢哋嚟講簡直是「濕濕碎」，目標客戶喺晒度，擺部車喺度好合情理吖，對不？由BRABUS操刀的700 Widestar，外觀及性能都得到全面升級，裝配專屬的寬體套件後，車身體積較標準版G-Class闊成10cm，配合更霸氣的頭、尾泵把及23吋「Platinum Edition」鍛造輪圈，可以話「型到核爆」，夠晒殺氣！

最大馬力高達700匹

動力升級是BRABUS 700 Widestar的焦點，工程團隊為原本的4.0公升雙渦輪增壓V8引擎換上自家的B40-700晶片，最大馬力及扭力分別飆升至700匹（+115匹）及950Nm（+100Nm），配合九前速SPEEDSHIFT TCT波箱及四驅系統，盡油加速4.3秒便可由靜止提速至100km/h，體積龐大的越野車都有咁嘅性能，都咪話唔恐怖。為保護輪胎，BRABUS 700 Widestar的極速會限制在240km/h（輪胎尺碼為305/35 R23，由Continental、Pirelli或YOKOHAMA提供），BRABUS另建議車主選用MOTUL高性能機油。早前，BRABUS的B40-700晶片已應用到AMG E 63及S 63上，至今已有一年時間，如今再移植至G 63，相信不會有兼容及穩定性的問題。

車身加上BRABUS的寬體套件，顯得分外霸氣。	車廂裝潢豪華極致，設備亦相當齊全。	座椅皮革以Two-tone設計，頭枕還繡上BRABUS的「B」字廠徽。

軚盤採用平底設計，並加上「BRABUS」徽章。

引擎換上BRABUS的B40-700晶片，馬力爆升至700匹。

排氣聲特設超靜模式

排氣系統也換上BRABUS出品，排氣聲浪可透過閥門控制，除可爆發澎湃的V8咆哮聲外，更特設超靜的「Coming Home」模式，深夜時分駛至住宅區就最啱用，唔怕嘈住人瞓覺，諗得夠晒周到，尾管部分還有銀或黑色揀。內飾方面，BRABUS 700 Widestar比起原來的G-Class更加豪華，雙12.3吋屏幕得到保留，並可升級至符合人體工程學設計的多功能軚盤。車廂皮革亦可從BRABUS Mastik或Alcantara中選擇，顏色更幾乎不受限制，甚至可按個人喜好添加珍貴木材或碳纖維飾件。事實上，BRABUS 700 Widestar的性能及豪華程度都在原本的AMG G 63之上，但以越野車定位的G-Class，又有冇需要去到這個境界呢？有錢就可以任性，明白的。

少不了的還有BRABUS金屬腳踏，每個細節都一絲不苟。	地氈也換上BRABUS出品，而且有多個款式選擇。	排氣聲浪可透過閥門控制，更特設超靜的「Coming Home」模式。

撰文：鄭浩文