BMW X4 M40i 升級增霸氣

寶馬（BMW）X4話咁快出咗4年，高性能與跑化SAC（Sport Activity Coupe）的定位俘虜了不少消費者的心，全球累計銷量已超過20萬部，認真犀利！最近，代理引進了全新第二代車型，唔止車體大咗，設備亦齊咗好多，主動式轉向頭燈、無線充電裝置等全屬標準配置，而且多了M40i版本，不論是性能、舒適及功能性都得到全方位升級。

BMW X4 M40i
售價：$899,000

自調格柵減低風阻

新X4繼續以房跑車線條為主調，採用短前懸及斜尾的設計，配合大型鬼面罩及拉長至4,752mm（+81mm）的車身，整部車看起來更具霸氣。值得一提是鬼面罩整合了一個名為「Active Air Stream」的主動氣門控制系統，可因應實際需要自動調校進氣格柵的開合角度，當引擎處於低負荷運行時，格柵會旋轉至關閉狀態減少車輛前方的空氣阻力，加上新X4的風阻系數僅Cd0.30，車重又比上代輕咗50kg，用油都少啲啦！廠方稱，擁有360匹馬力的M40i，百公里油耗僅9.2公升，有跑車嘅性能、又有四驅，$1.5一公里，又真係幾慳嘅！

運動路線實用兼備

走運動路線的X4，並沒有因遷就造型而忽略實用性，五座設定下的尾箱容量已有525公升（扳平後座可擴展至1,430公升），另備有電尾門及免匙系統等設備，足以滿足戶外出行需要。此外，新X4還追加了無線充電裝置及最新的iDrive 6.0，除可用手指直接在觸控屏操作各項功能外，iDrive的旋轉按鈕更可當成手寫板用，輸入中文字無疑輕鬆得多。不過咁，香港是用右軚車，意味手寫板設於駕駛者的左方，即是要用左手寫字囉。想玩Hi-Tech嘢，車主另可選配「Technology Pack」，當中已包括智能螢幕車匙、手勢操控、電子錶板及原廠導航等。代理話，選購X4 M40i的客人目前可以優惠價$2.5萬升級，仲要計咗FRT，攞得$90萬來買部車，斷估唔會慳呢兩萬五啩？

鬼面罩整合了主動氣門，格柵可旋轉至完全關閉減低風阻。

頭燈都用上LED，提供明亮的照明。

客人可選配21吋大軨，配合藍色制動卡鉗分外霸氣。

放大圖片

0~100km/h僅4.8秒

M40i是X4的性能旗艦，搭載的3.0公升直六渦輪增壓引擎可輸出馬力高達360hp，結合八前速Sport自動波箱，0~100km/h只需4.8秒，另配備專用的Adaptive M懸掛、M Sport制動及M Sport差速器，加埋可自行分配四輪動力的Performance Control，游走於蜿蜒山路仍身手非凡，唔知仲以為揸住部跑車添！事實上，駕駛X4 M40i不但可獲得速度上的快感，還可從中得到一整套的駕駛樂趣，聽覺享受便是其中一環，將行車模式設定為Sport，再拉高一點轉數，排氣管即時湧來一股渾厚的低頻，而且不是爆嘈吵耳那種，齋聽聲已夠High。

引擎扭力帶相當廣闊，段段都咁好力！

八前速Sport自動波箱，換檔反應敏捷。

錶板為數碼顯示屏，介面會隨不同駕駛模式改變。

內裝豪華外觀跑化

車廂布局亦賦予了舒適乘坐感，三區恒溫及全景觀天窗均為預載設備，氣氛燈更有6種顏色選擇，車主可按當時心情隨時轉換。據筆者經驗，大熱天時開藍色燈會感覺涼快一些，雖然對車廂實際溫度沒有影響，但自我感覺良好也不錯。另一方面，全新X4可搭配的內裝顏色多達6種（杏、黑、淺啡、深啡、米白及全新的Tacora Red），M40i另有藍/紅色縫線的黑色皮椅可揀。現時，代理已將巡航系統（連制動功能）、21吋軨及M多功能軚盤列作標準配備，而Adaptive LED更可依照駕駛狀況調節照射方向及亮度，豪華設備應有盡有，好玩得來又跑得，係咪好吸引先？

全車座椅均以皮革包裹，帶來舒適乘坐感。	車匙加上BMW M的藍紅配色，凸顯高性能身份。	車上設有三區恒溫冷氣，後排冷暖都可獨立調校。
車頂設有大天窗，為車廂注入充足陽光。	若選裝Technology Pack，會加入手勢操控功能。	尾箱空間不錯，五座布局下都可擺放大型行李。