BMW 320iA Saloon M Sport Shadow 50th Edition內外靚裝

今年是寶馬（BMW）香港50周年，為慶祝這個日子，代理推出多個特別版本，並以優惠價發售，如熱賣的320iA Saloon（F30 LCI）便多咗個M Sport Shadow 50th Edition，全車裝上跑化包圍及黑鏡殼，唔止型格指數爆升，車價仲平咗十幾萬，係咪勁筍呢？

售價：$429,900（推廣優惠）<br>為慶祝寶馬香港50周年，紀念版3系以優惠價發售。

售價：$429,900（推廣優惠）
為慶祝寶馬香港50周年，紀念版3系以優惠價發售。

M配件增悅目度

寶馬3系向來都不乏支持者，毋須降價已大把客仔，但出奇地這部50周年紀念版足足打咗個7折，呢鋪真係抵到癲！「M Sport Shadow」Package係咩嚟呢？睇資料，套裝已包含M擾流套件、M Sport避震、M Sport制動、19吋M輕量化合金軨、M多功能真皮軚盤、前座Sport Seats、黑鏡殼及精緻內飾等，不論是外觀或設備都比標準版正得多。如今代理開價僅$429,900，稱得上「賣大包」，基本上同送套M Sport Package畀你冇咩分別，想入手就要快喇，諗多兩諗過咗推廣期就唔抵啦！講多次，係7折呀，原價賣$615,000 o架！

頭燈及霧燈都用上LED，更節能耐用。

側鏡殼噴上亮黑色，並整合了指揮燈。

引擎為2.0公升Turbo，扭力輸出充沛。

低轉高扭起步爽

動力配置就維持原來的2.0公升直四BMW TwinPower Turbo引擎，容積雖不大，力量輸出卻隨傳隨到，渦輪增壓在很早階段已無聲無色介入，起步已相當敏捷。320iA於1,350rpm已可釋出270Nm峰值扭力，而且可一直Keep到4,600rpm，怪不得反應那麼好了。標配於320iA的八前速Sport自動波箱早已廣泛應用到不同車系上，轉波快、平順已是不爭事實。試車時於公路以80km/h的穩定車速行駛，引擎轉速更不到1,500rpm，不但寧靜，百公里綜合油耗更低至5.3~5.8公升，即是約$0.9/km！儘管320i並非標榜高性能，但只要將行車模式切換至「Sport+」亦可以好生猛，除了加速更爽快外，甚至會關掉部分循迹控制，同「ECO PRO」及「COMFORT」模式相比猶如兩部車。別忘記，呢部50th Edition已預載M Sport避震及制動，試問點會唔好玩吖？

揭起尾箱地台板，還有額外的載物空間。

出車已預載後泊鏡及前/後泊車感應，泊位自然輕鬆過人。

配上19吋輪圈的3系，看上去更見跑格。

高貴車廂落足料

一直以來，3系都以靚樣、好揸見稱，加上尺寸恰到好處、車價相對親民，喺香港咁賣得也不無理由。這次拍攝的320iA Saloon M Sport Shadow 50th Edition，內籠配上紅色皮椅、深灰色絲絨地氈及金屬色飾件，展現出高貴與運動風格的氛圍。前排中央手枕內還設有無線充電板，放部手機喺面就充得到，毋須再插線咁麻煩。為提升駕駛便利性，後泊鏡及前/後泊車感應已列為標準配置，有畫面又有聲響提示，泊入超窄車位都變得Easy啦！其餘設計還包括LED頭燈、雙區恒溫冷氣及電動天窗等，整體嚟講都幾足料，又畀到駕駛者Driving Pleasure，這就是寶馬最迷人之處。

車廂布局運動化，一貫BMW風格。	全車座椅皆以紅色皮革包裹，滲透着熱血氛圍。	車頂設有電動天窗，而且屬標準配置。
後排設有獨立送風口，而且可作角度調校。	多功能軚盤為M出品，後方另設加減波撥片。	行車模式共有4種選擇，節能或運動化操控可隨時切換。