Volkswagen Polo Sport前衞節能

想喺鬧市靈活穿梭、又要經濟，有咩好得過節能小車？一來慳油，而且方便進出橫街小巷，如Volkswagen最近帶來的全新Polo Sport，便配上高科技的1公升三缸引擎，不僅性能更強，甚至可做出4.7L/100km的極低油耗水平，慳到好似混能車咁！

Polo Sport
售價：$189,980

年輕化更具魅力

都會小車的主要客群中，不少是年輕消費者，要吸引呢班客源，設計上除咗迎合後生仔女的口味外，Gadget嘢亦唔少得。新Polo可以話多姿多采，可選擇的車色多達11種，當中更包括紅、藍、橙等鮮艷顏色，夾番自己嘅個性。外觀設計比上代更Young，車側採用了立體的雙骨線設計，另將LED頭、尾燈列作標準配置，配合隱形B柱、新錶板及特大的全景式天窗，都讓新車看來更具魅力。

推廣期內出車可享特別優惠，免費升級至17吋Pamplona合金軨。

引擎容積只有1公升，扭力卻高達200Nm。

尾箱容量增至351公升，可輕鬆放入大型行李。

車體放大更闊落

一如多個同門車系，第6代Polo同採用MQB模組化底盤，特點是輕巧及剛性高，車架硬度比上代提升多達28%，可承受的碰撞能力得到大大提升，早前在「Euro NCAP」的歐洲撞擊測試中，新Polo便獲得五星頂級評分。21世紀的今日仲認為Compact Car不安全？是時候改變諗法喇，老友！另一方面，新Polo的體積進一步放大，長闊高分別增加至4,053（+81）、1,751（+69）及1,461（+7）mm，並採用長軸距、短前懸的設計，不僅看來更富動感，乘坐及載物空間都超乎多數人對小車的印象。

Polo已發展至第6代，車身體積放大了不少。

波箱為七前速DSG自動波，換檔反應敏捷。

控台配備6.5吋觸控式屏幕，通話及音樂播放都可在此控制。

三缸偈力猛慳油

動力配置是第6代Polo的焦點，引擎不再是過往的1.4L四缸NA或1.2L四缸Turbo，而是1.0L三缸Turbo。沒睇錯，的確是1.0L三缸！相信好多5代Polo車主都會問，得90匹及160Nm的1.2L四缸Turbo都是剛好夠用，呢部仲要少一缸、容積又少咗，得唔得（口架）？這方面可少擔心，副偈是細咗，性能卻不降反升，最大馬力、扭力輸出分別增至115匹（+28%）及200Nm（+25%），平心而論，1.0L車有咁嘅輸出都咪話唔得人驚，別忘記搭配1.4L四缸Turbo的Golf 230 TSI都是得200Nm咋！實際揸起來又點呢？搭配七前速DSG雙離合器波箱的Polo，中、低速表現其實同1.5公升NA車沒太大分別，反應甚至仲敏銳一點，開起來不太似三缸車，副偈亦唔算好震，整體嚟講是一副很有水準的三缸引擎。結合Start/Stop及再生制動模式，廠方公布的百公里油耗僅4.7至4.8L，未計燃油折扣優惠都唔使$0.8/km，係咪夠晒經濟呢？

車頂設有電動天窗，可前後滑動或向上揭起。

多功能軚盤以皮革包裹，可控制錶板資訊及音響聲量。

儲物格整合了無線充電板，帶來不少便利。

設電話無線充電板

車廂布局也注入動感前衞氣息，多功能皮革軚環採用平底設計，同時標配了「Composition Colour」資訊娛樂系統，可直接在觸控式控制通話及音樂播放等功能。不要小看波棍前方的儲物格，原來已整合無線充電板，放部（指定）電話上去就叉到電。儲物格旁另有USB插口，可隨時為智能物品充電。此外，新Polo的尾箱容量更有着顯著提升，由原來的280公升大幅增至351公升，加上後座椅背可向前翻平，擺放大型行李有更大便利性。推廣期間出車仲可以免費升級至17吋Pamplona合金軨，心郁不如行動啦！