Gadgets表愛意媽咪輕鬆減壓

每年5月第2個星期日嘅母親節，總要絞盡腦汁氹媽咪開心，除咗送花送蛋糕，梗係唔少得窩心實用嘅禮物，不妨考慮新一代智能Gadgets和家電，讓媽咪與時並進之餘，仲可減輕佢嘅家務壓力。今次一於按不同需要，搵出「智」啱媽咪嘅減壓良品啦！

按摩類：局部紓緩壓力

若果媽咪日頭要返工，夜晚要做家務，真係會身心俱疲，不妨考慮一些按摩產品送畀佢哋，以表孝心。

發熱電梳後備尿袋

Zuanzhuan鑽轉無線梳具有發熱功能，只需一分半鐘即能預熱，慢慢輕按頭皮有助紓壓之餘，還可幫助媽咪梳出理想髮型。整把梳只比一部手機長少少，並用上淡粉紅色，小巧美觀。另一賣點是可化身「尿袋」使用，內置2,200mAh電池可為手機充電，為老媽子解燃眉之急。

天鵝按摩刁鑽到位

好多人鍾意送按摩器畀母親大人，可惜Size又大又重。Rilamingo手提按摩器模仿天鵝頸部設計，彎曲機身方便用戶按摩刁鑽部位，例如肩背、腰背等。它不設開關，在「鵝頭」稍稍施力，震動器即會啟動，而且指壓感覺柔和具層次，有效紓緩僵硬肌肉。還附送Emoji貼紙，提供心心等16款表情圖案，可以同媽咪一同粉飾機身。

Emoji貼紙提供心心等16款圖案。

Zuanzhuan鑽轉無線梳具有發熱功能。售價：$930 （a）

設有USB介面，可變身尿袋為手機充電。

家電類：家務好幫手

整理家務、買菜煮飯，媽媽每天都幾乎忙到團團轉，想減輕其家務負擔，新一代家電定能滿足各位要求。

迷你除蟎機手掌咁細

很多媽咪都會定期清理塵蟎，一係勤洗床單，一係買部又重又大的吸塵蟎機，每次都勞師動眾。這款H&C三合一手提塵蟎機只有手掌咁細，重265g，單手就能輕鬆使用。它能夠清走塵蟎、花粉及懸浮粒子，配合寵物專用針梳頭，更能吸走寵物身上的蟎蟲或皮屑，一物多用，慳番阿媽唔少打掃時間。

機身只有手掌般大，單手就能輕鬆使用。售價：$799（a）

除蟎機附有3塊濾網，清理後可循環再用。

蒸氣拖地環保衞生

傳統拖地方法繁瑣又費時，一桶水反覆使用，隨時愈拖愈污糟。意大利POLTI為此開發出無線蒸氣清洗機MOPPY，鋁合金拖把附有微纖維抹布，使用時可成功抓緊近99.9%的微粒、病菌和致敏原。只要將拖把放於底座，內裏蒸氣系統便會釋出高於100度的蒸氣，只需20秒便可殺死有害物質，環保又衞生。

鋁合金拖把輕巧兼可伸縮，拖頭更可以360度靈活轉動。售價：$2,180（b）

MOPPY底座的蒸氣系統，會釋出高於100度蒸氣殺菌。

智能類：湊孫減負擔

好多香港人搵長輩幫手湊小朋友，想有效監控BB狀況和減輕婆婆嫲嫲負擔，不少Gadgets都加入手機連動功能，是湊BB好幫手。

5吋芒監察嬰兒

Motorola MBP36XL嬰兒監察器，支援4個可擴展攝像鏡頭及紅外線夜攝功能，可於300米距離內透過5吋屏幕觀察嬰兒。同時對應2.4GHz Wi-Fi技術，把監察器連接家中無線網絡，便能經手機或平板觀看畫面，即使媽子出外買餸，也能隨時了解寶寶情況，充滿電後可使用3小時。

MBP36XL鏡頭細小兼附有腳架，可放於家中任何角落。

5吋屏幕左右兩邊均備有按鍵操控。售價：$1,399 （c）

BB探熱兼追蹤

Pomo推出的Bebe設有紅外線感應器，搖一下便能夠啟動體溫模式，對準BB頭部即可顯示其體溫，揈兩下則會切換至物件測溫模式，可量度洗澡水度、奶溫等。另一特點是可連接《Pomo Bebe》手機App，能記錄如體溫、睡眠質素等數據，當中較為實用的是Find Me功能，感應器一旦遠離手機超過15米，便會震動提示家長及顯示地圖位置。