日牛名所店長醒你養牛貼士

正確退漿

買條新牛仔褲返嚟第一件事就係「退漿」，亦即將牛仔褲表面的漿水退去。好多人諗住放落水浸過夜就算，但Terence話咁樣並唔正確：「應該先將牛仔褲所有鈕釦扣上並反轉，再將牛仔褲放到盆中浸水，每隔1小時換水，以免漿水停留在牛仔褲表面。第1、2盆水應該會偏黃，嗰啲正是漿水，到第3盆水應該開始呈現Indigo色，咁就代表牛仔褲棉線接觸到水，算是退漿完成。有人喜歡將牛仔褲掛起『陰乾』，但這個方法比較浪費時間，所以我自己會將牛仔褲放入洗衣機脫水，乾得快之餘亦可以令牛仔褲縮水縮到盡，亦唔怕因為長時間濕水掛起而令牛仔褲變形。」

勿亂用洗衣粉

坊間經常有人講牛仔褲要唔洗先會有靚貓鬚，但其實唔衞生之餘仲可能會孳生細菌兼破壞牛仔褲上的纖維。只要揀啱「洗牛粉」其實就冇問題。「坊間一般可以買到的洗衣粉大多數都有去漬漂白成分，所以唔建議用於牛仔褲這一類Indigo藍染產品上，因為會令牛仔褲加快褪色，變相令丹寧布料深淺對比（亦即貓鬚）減淡。建議用番專用『洗牛粉』清洗會比較好，品牌方面岡山製的INDI靛及大阪牛仔褲品牌SAMURAI所推出的『洗牛粉』都唔錯，雖然後者成分天然，但大豆氣味未必人人接受得到，所以我個人會比較推薦INDI靛。」對於坊間流傳落鹽或者醋洗牛仔褲，Terence認為是一大謬誤。「我個人經驗覺得呢兩種偏方都唔可行，而且仲可能對牛仔褲的棉線構成損害，建議大家用專用『洗牛粉』會相對穩陣。」

牛仔褲表面漿水的主要作用是令丹寧布挺身以便裁剪切割，所以如果買咗新牛仔褲就記得要「退漿」。	Terence推介大家用INDI靛及SAMURAI兩個品牌的「洗牛粉」，如果唔鍾意大豆氣味可以選擇無香味的INDI靛。	邊個話一定要手洗先可以操到靚牛？你睇Terence呢兩條牛仔褲一樣係用洗衣機洗，着用9個月已經有好靚的色落效果。

機洗牛仔褲一樣掂

許多人怕用洗衣機洗牛仔褲會傷褲，所以會手洗牛仔褲，但Terence就話機洗絕無問題。「我諗大家選擇手洗嘅主要原因係避免牛仔褲甩色到其他衣物上。但當你家中牛仔褲數量有番咁上下時，每條都手洗其實會幾辛苦，所以我會選擇用洗衣機一次過洗幾條，始終牛仔褲清洗次數都會比較少，機洗絕對會比手洗乾淨。」

牛仔褲穿窿除因磨損外，亦可能是細菌破壞纖維引致，所以異味持續的話就一定要清洗。

收藏時要注意防潮，另要記得將摺腳位置放下，以免積聚大量塵埃，產生細菌破壞纖維。

辟除異味有辦法

好多人怕牛仔褲洗得太密，令色落效果唔靚，又或者驚愈洗愈薄令牛仔褲穿窿，即使有異味亦置諸不理，但咁做其實可能會有反效果。「假如有輕微異味的話，建議反轉牛仔褲掛於通風位置吹一日，令異味散去。但如果異味持續的話就一定要洗，因為好有可能是牛仔褲上有細菌而產生異味，細菌停留於牛仔褲表面會破壞纖維，所以牛仔褲上出現穿窿位除了因為磨損緣故外，亦有可能是細菌破壞纖維所致。」

收藏方法要深究

當家中的牛仔褲存量漸多時，少不免會將一些不常着的牛仔褲「打入冷宮」，可能你認為牛仔褲天生就係粗着，收藏方法亦毋須太深究。但原來唔妥善收藏，到你三五七年後再將牛仔褲「出土」時可能已經恨錯難返。「牛仔褲其實都幾容易產生霉菌，尤其是在潮濕的香港發霉情況就更嚴重，所以我會在收藏牛仔褲的地方放置大量抽濕用品，最近還添置了抽濕機，另最重要一點是如果有摺褲腳習慣的話，記得要在收納前先將褲腳放下，因為如果長期保持摺腳狀態收藏，褲腳位置就會積聚大量塵埃，繼而產生細菌並破壞纖維。」

撰文：賴文曦

攝影：胡振文