家居變智能 「掃」舊迎新
年廿八洗邋遢，好多人都會在農曆新年前打掃家居，呢個除咗係清掉垃圾和舊物嘅好時機，仲可以順便換埋新家電。原來新一代家居清潔和個人衞生工具，都植入智能功能，可透過手機App遙距操控和監控設定，各位不妨喺狗年齊齊將家居智能化啦！
清潔篇：吸塵機械人 自動擬定路線
大掃除當然要抹乾淨地板，以便新年招呼親友，Ecovacs Robotics出品的抹地機械人Deebot Ozmo 930就幫到手。它結合掃地、吸塵及拖地功能於一身，內置Smart Navi雷射導航技術，配合防撞感應器，撳個Auto掣就會自動走勻全屋，掃描室內地圖及擬定清潔路線。機底備有雙滾刷及吸口，可吸入塵埃和毛髮；另可加設抹布配件及水箱，掃地兼拖地一Take過。還對應《Ecovacs》手機App，讓用家遙距控制開關、實時監測狀態、預約清潔及設定模式。
以App為據 刷靚牙齒
屋企抹到乾乾淨淨，個人衞生一樣咁重要。採用聲波震動科技的Philips Sonicare DiamondClean Smart 9500，外形同一般電動牙刷冇乜分別，卻植入一系列智能刷頭和智能感應系統，可經藍牙與《Sonicare》手機App連接。App內可實時偵測用家正使用的刷頭，並自動調校至合適刷牙模式；犀利在可實時偵測並顯示口腔圖追蹤刷牙位置，還支援刷牙力度壓力感應，確保用家刷得乾淨又唔傷牙齒。
同場加映：免攀爬抹窗好幫手
窗口一向是較難清潔的地方，Ecovacs Robotics出品的抹窗機Winbot 950，撳個掣便可自動執行抹窗任務。它透過機底的可拆式軟墊進行清潔，再用刮刀清除灰塵及污垢。另支援Smart Drive系統，偵測窗戶邊緣及障礙物；加上提供遙控器讓各位手動控制清潔路線，使用更加方便。
健康篇：實用智能磅 圖表分析
體重磅好多人屋企都有，但淨係知道身體幾重始終未夠全面。Nokia Body+智能磅可同時計算出體脂百分比、肌肉質量、水分、骨質量、體質指數等多項健康數據。另可透過Wi-Fi或藍牙同步至《Health Mate》手機App，直接將數據整理成不同圖表；磅上的屏幕可顯示最近8次體重變化趨勢，新年Keep Fit就啱晒。另一實用之處係能自動辨識8位用家，並將相關用家數據同步至App上，一家大小使用都冇問題。
冷暖氣調控 手機搞掂
不少人屋企都會安裝冷暖氣機，冬天開暖氣，夏天開冷氣，幾乎日日都要運作。想調控屋企嘅溫度，可考慮由港人研發的智能配件Ambi Climate 2。用家可於《Ambi Climate》手機App設定舒適、溫度、離開及手動4個模式，機身便會發射紅外線代替遙控器設定冷暖氣機。產品更支援人工智能技術，用家只要於App反映太熱、剛好、有點冷等，系統便會分析濕度、天氣、時間再自動調節溫度，唔使用家手動設定咁麻煩。
柔和床頭燈 隨時轉色
香港人成日對住手機和電腦，家居燈光對於眼睛健康尤其重要。想夜晚有合適燈光，又怕打擾屋企人安睡，可試吓米家床頭燈，它採用專利混光技術，提供1,600萬種燈光顏色選擇及亮度調校。除了可透過燈罩頂部的觸控面板調控亮度、顏色及彩光、日光、流光等燈光情景模式，用家亦可透過《米家》App遙距操控床頭燈。如果用開小米手環的話，更可與床頭燈配對，當手環識別用家入睡後便會自動關燈。
查詢：（a）2262 1988、（b）2619 9663、（c）health.nokia.com/hk/en/、（d）www.ambiclimate.com、（e）www.mi.com/hk/mi-bedside-lamp/
撰文：林子聰
攝影：張錦昌
模特兒：Koei（Reborn Production）