免買卡免設定！CloudSIM漫遊新勢力
今時今日去外地旅遊，最重要唔係計劃行程或安排食宿，而係解決上網問題，上到網無論衣食住行等瑣事都迎刃而解。不過去「鴨記」買SIM卡又麻煩，租漫遊蛋要兼顧交收問題，直接買網絡商Day Pass又怕貴。其實近年興起CloudSIM新玩法，只要有部CloudSIM裝置喺手，身處任何地方都可以買當地數據流量上網。今次以GlocalMe G3及Skyroam SOLIS兩機作測試，睇吓係咪咁好用？
甚麼是CloudSIM？
CloudSIM技術是通過雲端收發信號，然後利用本地網絡實時傳輸到用戶手機之中，簡單來說是以雲端SIM卡取代實體SIM卡，讓外遊人士可享用更低廉的當地上網或通訊服務。
GlocalMe G3觸控屏幕
G3屬GlocalMe第3代產品，機身植入4吋觸控屏幕，方便用家查看網絡、電量、剩餘數據等資料。另備有兩個nanoSIM卡槽，即使唔用CloudSIM服務，亦可插當地SIM卡上網，靈活易用。而且內置5,350mAh電池，提供15小時續航力，仲可透過USB插口為其他裝置充電。網絡覆蓋方面，G3支援GSM、CDMA、WCDMA、FDD-LTE、TDD-LTE制式，支援英國、美國、法國、意大利、中國、日本、韓國、台灣、泰國等超過100個地區。用家可透過官網或者《GlocalMe》手機App為帳戶增值，提供「按流量計費」及「流量包」兩個選擇，前者統一0.05歐元/MB，後者按區域而定，以台灣為例，備有300MB/3歐元、1GB/5歐元、3GB/12歐元等選擇。
SOLIS 橙色圓盒
作為Skyroam第2代產品，SOLIS的橙色磨沙圓盒外形相當突出，由於機身不設屏幕，主要靠長按機側按鍵來開關；而機面Wi-Fi按鍵可同時顯示剩餘電量。較特別是用家可隨時扭開SOLIS外殼，更換兩枚18650充電池，續航力達16小時，而電池底部備有一個microSIM卡位，可當作傳統流動Wi-Fi蛋使用。而Skyroam的服務覆蓋超過100個地區，包括北美洲、南美洲、歐洲、中東、非洲、亞洲及南太平洋，支援GSM、WCDMA、FDD-LTE、TDD-LTE網絡。用家只需根據機身貼紙的Wi-Fi名稱、密碼連接網絡，再以手機掃描QR Code，便可於瀏覽器登入Skyroam控制頁面，查看接收、連接人數、裝置電量等。至於收費則提供包月及全球日費兩款，前者價錢為125美元/月，後者分為9美元/1天、45美元/5天、90美元/10天、180美元/20天4款，於公平使用原則下可享無限數據用量。
台北實測 網速近30Mbps
究竟CloudSIM喺外地好唔好用？今次小記於台北實測，發覺GlocalMe G3及Skyroam SOLIS買流量計劃都非常方便，即買即用毋須設定，如果用量唔多可揀前者，以購買G3的台灣3GB計劃為例，剩餘的數據流量可保留30天，遇着親友外遊便可Share一齊用。至於SOLIS可於日費計劃下，於全球無限使用數據，假設早上由台灣返港，下午再轉機回內地，便可使用同一日費計劃。速度方面，小記於台北車站附近的地下街以《Speedtest》測試，G3平均上下載速度分別有28Mbps及22Mbps，瀏覽網頁及睇片相當穩定；SOLIS的平均上下載速度分別為2~3Mbps及32Mbps左右，雖然下載速度較高，但想上傳相片或影片就可能較慢了。
同場加映：Soft SIM另類之選
若各位經常到外地旅遊公幹，又唔想購買CloudSIM流動裝置，其實亦可考慮SIM卡式的AIRSIM。AIRSIM用上Soft SIM技術，用家可透過SIM卡於App內購買數據漫遊計劃，官方表示已覆蓋超過80個國家，價錢因地區而定，例如台灣3天4G數據售$24、日本5天4G數據售$98，要留意是用量達500MB後會限速至256kbps。
撰文：林子聰
攝影：莫文俊、廖俊斌
查詢電話：（a）8191 2660、（b）2950 0175