轉季護皮你要識！

清潔發霉

在眾多皮革製品當中，皮褸出事率就最高，因為着上身後或多或少都會吸入身體排汗所產生的濕氣，加上不少人習慣着幾季才清洗一次，積積埋埋咁多濕氣仲要放入衣櫃，點會唔發霉？如果發霉情況尚算輕微，只須用乾布抹去霉點，再掛於通風處曬晾三數天就可以去除發霉。若情況較為嚴重，就要買皮革專用的清潔膏或以酒精清潔。不過如果你要清潔的是麖皮或磨沙皮褸，便不能用此方法，否則會令皮革顏色變深。

日本製的皮革清潔膏get COLUMBUS（傑姿哥倫布斯）在坊間評價甚高，適用於大部分皮革製品包括：皮褸、皮靴及手袋等。建議在使用前先於皮革物品不起眼位置試試，因為有些皮革可能會因為吸收清潔膏而變得深色。	如果家中沒有皮革清潔膏，不妨試試將75%酒精噴於發霉位置進行清潔。提醒大家盡可能別用清水清潔，因為如果乾唔透的話極有可能會再次發霉。	不要用皮革清潔膏或酒精清潔磨沙皮（左）和麖皮（右），因為有可能令皮革顏色變深。

對抗龜裂

正如皮膚需要搽Lotion預防龜裂，皮革製品在乾燥秋冬也同樣需要特別護理。坊間不少品牌也推出皮革專用的保護劑，當中最常見的是貂油（Mink Oil）或馬油（Horse Oil）。前者防污性極佳，而後者則較易被皮革吸收；另還有一種牛腳油（Neatsfoot Oil）同樣具護皮作用，如果用於原色植鞣皮革（Vegetable Tanned Leather）上，可加快皮革變色，最啱想「養皮」又想偷懶的人使用。同樣地，如果一時三刻無上述皮革保護劑在手但又想「急救」皮革製品，用平時搽身用的Body Lotion頂住檔一樣掂，至少唔會「傷皮」先。

貂油（Mink Oil）兼具滋潤及防污功效。	馬油（Horse Oil）較易被皮革吸收，搶救皮革龜裂必用。	如果將牛腳油（Neatsfoot Oil）用於植鞣皮革上，可加快其顏色轉變。

防水保護

水分向來都是皮革大敵，雖然秋冬較少落雨，但都要預防皮革製品被沾濕。市面上有些波鞋防水噴霧也同樣適用於服飾、手袋甚至梳化上，而且能於皮革表面形成保護薄膜，相對於直接塗皮革保護劑而導致皮革變色的機會也較低。（但絕非百分百不會變色，因為不少人試過為白色波鞋噴防水噴霧而令波鞋變黃，所以最好挑選專為皮革用品而推出的防水噴霧）。

坊間大部分波鞋防水噴霧都適用於皮革產品。	不想用防水噴霧後皮革變色？選用專門對應皮革產品的防水噴霧會較為穩陣。	STYLUX革匠管家提供皮革轉色及修復皮革手袋等服務，即使手袋爛咗都可以救得番。

徹底轉色

如果皮褸、皮袋的發霉及污漬問題已嚴重到「無可挽救」，你還可以出最後一招─將皮革轉色，而呢啲高難度工作當然是交畀專業人士做啦！基本上只要是皮革產品都可以做到轉色，但只可以由淺色變深色，但就可以延長皮具壽命。價錢方面普遍都要接近千元先有交易，有需要的話可自行與專業人士慢慢研究實際收費。

洗之達人是日本專業名牌翻新維修連鎖店，所用技術及產品均源自日本。

位於中環的卓峰皮具維修護理專門店，創辦人鄭卓峰擁有30年皮具維修經驗。

撰文：賴文曦　

相片：互聯網