Galaxy C8景深抓拍雙得益彰

雙鏡拍攝以往是旗艦手機專利，近期多咗批國產中階機以雙鏡招徠，估唔到連韓國大廠Samsung都加入戰團，在新推出的Galaxy C8玩盡雙鏡功能，不但使抓拍質素提升，仲有得玩淺景深效果。同時支援雙卡雙待及Dual Messenger「雙開」等功能，機價二千幾元，旅行粗用相得益彰。

售價：$2,598（32GB版）、$2,998（64GB版）

5.5吋全高清屏幕

Samsung嘅C系中階手機向來頗受用家歡迎，今次Galaxy C8外形沿用直板圓角設計，5.5吋全高清屏幕配以玻璃機面及金屬機背，手感紮實，還保留了具指紋辨識功能的實體Home鍵，輔以返回（Back）、最近使用程式（Recent Apps）輕觸按鍵，對Android手機用家可說用慣用熟。惟新機僅提供黑、金、粉紅三色選擇，驚喜欠奉。

即時預覽景深效果

同廠旗艦作Note 8首玩雙鏡設計，估唔到廠方第2部雙鏡手機竟然是中階的Galaxy C8。但其雙鏡設計稍稍不同，分別由1,300萬像素RGB及500萬像素黑白鏡頭組成，前者主要捕捉色彩細節，後者則專攻光暗層次，令相片更銳利清晰。另內置「景深即時預覽」模式，可即時預覽及調校虛擬的淺景深效果。順帶一提，新機同時備有「貼紙」模式，可實時為相片加入卡通、文字、面具等特效，玩味一流。

全金屬機背手感不俗，而雙鏡頭沒有凸出，可減低刮花機會。

機面設有實體Home鍵，同時支援指紋辨識功能。

設有兩個卡槽，可擺放兩張SIM卡，或者SIM卡及記憶卡各一。

「雙開」通訊軟件

規格方面，新機搭載Helio P25八核心處理器，備有3GB RAM配32GB內存，及4GB RAM配64GB內存選擇，效能只屬中階水平。反而軟件上有驚喜，新增Dual Messenger「雙開」功能，無論WhatsApp、Facebook、WeChat、Line、Snapchat、KakaoTalk等即時通訊軟件，均可以開啟兩個帳戶，還可同時存取機內文件，以後公私帳戶就唔使時常登出登入。當然唔少得語音助手Bixby、分割屏幕等應用，功能齊備。

機底設有microUSB及耳機插口，而喇叭則移至機身右側。	支援分割屏幕功能，可同時使用兩個程式。	只要長按指定程式圖示，再選擇「安裝第二個應用程式」即可玩「雙開」。
特設「景深即時預覽」模式，可模擬淺景深效果。	可為相片加入「貼紙」效果，炮製個人化相片。