德國直擊Mercedes-AMG GT R狂野街霸

將賽車技術應用到量產車上並非新鮮事，不過又唔一定要去到平治Project One咁極端，用到F1賽車引擎咁浮誇嘅。想搵部真正可落場砌、有實力KO對手嘅街車，其實Mercedes-AMG的GT R已夠晒玩，原裝車竟可喺紐布寧跑出7分10.9秒的圈速，並創下量產後驅車場地紀錄。早前在德國試過車，性能狂野到拉也拉不住，究竟這是甚麼怪獸？

Mercedes-AMG GT R
售價：$2,888,000

更高層次輕量化

撇開GT3及GT4等賽車版本不計，能夠在道路上合法使用的AMG GT家族成員已有6名，今次在Bilster Berg測試的AMG GT R，便是當中性能最癲喪的一員。或者有人會問，GT R的馬力只僅多GT C 28匹，何解GT R在賽道上會喪咁多呢？聽廠方人員講，GT R的輕量化工程更高層次，多個部件都換上碳纖物或鈦金屬物料，比起GT C Edition 50足足輕上70公斤。同時，車頭設有主動式擾流器，別睇小這個僅重2公斤的裝置，它能因應車速及行車模式，自動降低40毫米來改變氣流動向，當車速達到250km/h時，可產生約40公斤的重力來抑制前軸抬升。好處是甚麼呢？簡單而言，就是有道力壓住個車頭，使輪胎有更佳抓地力，而且可減少高速行車時的虛浮感。

試車活動在Bilster Berg舉行，賽道設計極富挑戰性。

車廂布局豪華中帶跑味，多個部分都用上麖皮包裹。

多處加入碳纖維飾板，顯得分外型格。

試車賽道具挑戰性

GT R是採用4.0公升V8雙Turbo引擎，增壓值由GT C Edition 50的1.25 bar提升至1.35 bar，並重新編寫供油程式，調校傾向賽車化，700Nm的扭力配合轉波頗快的AMG SPEEDSHIFT DCT 7G波箱，由靜止加速至100km/h只需3.6秒！位於Bad Driburg的Bilster Berg賽道長4.2公里，共有19個彎，個人認為這是歐洲其中一個最有挑戰性的賽車場，彎道設計複雜加上不斷的上上落落，假如汽車重心控制得不好，很容易便會令輪胎失去抓地力導致失控，就連教練也稱這裏為「小紐布寧」，難度可想而知！揸咗幾個圈，首個印象是車尾動態很「活躍」，好玩是真的，但對駕駛者的要求也相對地高，油門幅度很容易影響過彎時的車尾走動，就算在ESP ON的情況下，畀油過多也會導致車尾外走，但情況很受控的，這種安全帶刺激的駕駛感，令人一試愛上。

循迹系統設有9段調校，扭動黃色旋鈕便可進行設定。

座椅採用桶形設計，並配上黃色安全帶。

門檻裝上金屬飾條，並附有「AMG」電鍍字樣。

後軸打滑可調校

自問駕駛技術了得，又想有自由奔放的駕駛感，揀AMG GT R冇錯(口架)喇。預載的AMG TRACTION CONTROL是直接從賽車運動移植過來，循迹系統設有9段調校，只要扭動中控台的黃色旋鈕便可進行設定，Level 1適用於濕滑路面，Level 9則容許最大程度的後軸打滑，想每個彎都甩住咁入，扭至Level 9就對了，喜愛的話還可關掉ESP，保證夠爽。不過要揸得掂先好，585hp後驅車仲要熄晒穩定系統，要打轉，話都冇咁易！車廂方面，不論是布局或用料都充滿跑味，碳纖維飾板、麖皮面料以至賽車桶櫈都可在車上找到，車主另可選配AMG Track套餐，當中包括翻車保護系統及4點式安全帶。很想要？要畀啲耐性喇，即使花得起$2,888,000的車價，最快也要明年才有車交，想快啲有得玩就早落訂吧！