絲路直擊法拉利812 Superfast速勢爆發

法拉利（Ferrari）跑車有邊個唔知快？如果可以揸住部史上最強嘅「拉利」，喺絲綢之路飛番轉又會是甚麼感覺呢？早排《東網》記者採訪法拉利70周年大中華慶祝活動時，順道在戈壁沙漠一帶試過812 Superfast，2.9秒破百的性能在公路上視任何對手如無物，快到無倫！

Ferrari 812 Superfast

GT定位兼顧舒適

於年初日內瓦車展發表的812 Superfast，是以F12 berlinetta及F12tdf為設計藍本開發，搭配的6.5公升V12引擎可產生800CV的最大功率，為法拉利12缸跑車的發展寫下新一頁。812 Superfast的定位偏向GT，兼顧到性能及長途駕駛舒適性，不管在沙石路面開得有多快，於車內仍不會感到多大彈跳，駕乘感都跟488 GTB很不同，812 Superfast確是好快，卻不是那種每個彎都要拚盡才叫過癮的一類車。始終，812 Superfast的車體近2米闊、車頭亦偏長，在狹窄山路跑彎點都有啲壓力，但不得不服的是揸完數百公里後，都冇話好疲累或周身痛，換轉揸其他０~100km/h同樣少於3秒的跑車在沙石路戥幾個鐘，後果應該好唔同。

儀錶板由一個中央轉數計及兩個電子顯示屏組成，提供豐富的行車資訊。

首飾箱上方裝有顯示屏，乘客可睇到行車速度及檔位。

軚盤以皮革及碳纖維製成，並採用跑車常見的「D」形設計。

高轉零舍有Feel

812 Superfast配備了最新5.0版的側滑角控制系統（Side Slip Control‧SSC），優點不僅令跑車更易操控、過彎更靈活，進階駕駛者更可隨心所欲地做到甩住走的行車動態，車尾活潑且受控，一部FR GT可校到咁好Feel，怎會不爽？近年，不少Supercar都改配渦輪增壓引擎，全新的812 Superfast則繼續採用V12 NA，愈踩得高轉就愈醒神（只怕你唔夠狠），於8,500rpm時可輸出800CV的最大功率，排氣聲甚至比打雷更震撼，一旦感受過812 Superfast的高轉快感，會有種「返唔到轉頭」的感覺，有時在公路上也不願意入五波甚至四波。很瘋狂？對呀，812 Superfast令我瘋狂。

行車模式沒有Comfort Mode，一嚟就Sport。隨着引擎轉速增加，軚盤上方會相繼亮起提示燈。

行車模式沒有Comfort Mode，一嚟就Sport。隨着引擎轉速增加，軚盤上方會相繼亮起提示燈。

隨着引擎轉速增加，軚盤上方會相繼亮起提示燈。

座椅提供極佳舒適性，適合長途駕駛。

作為代步車一樣掂

部車有成800CV、又是速度最猛法拉利，如果有錢，不就是直接買812 Superfast就最好？筆者並不認為這樣，如488 GTB這類「純種」跑車，馬力雖不及812 Superfast，調校卻更着重駕駛樂趣、懸掛設定也激進得多，更適合熱血駕駛者。相反，812 Superfast作為平日代步車卻可以好舒服，開起來一啲都唔緊張。要快，扭去Race Mode，再唔係熄埋個Traction Control，800CV夠晒你爽，但前提是你要控制得來，同埋有路畀你玩（香港似乎冇）。活動上另外短試了GTC4Lusso，這部四座四驅GT再舒適一點、實用性更強。點揀好？都幾頭痕，但這些有錢人的煩惱，未到我去諗。