Volkswagen e-Golf長氣二代

鍾意揸車又唔想畀油錢，除咗搵人埋單或者揸公司車外，買電動車似乎是目前唯一可行方案。電動車具備零油耗及零排放的特點，理應好大吸引力，惟早期車型續航力不足，實際環境下行百零公里已經「乾塘」，唔少人聽到都耍手擰頭。隨着電池愈趨成熟，新世代電動車已襟行好多，就如Volkswagen全新二代e-Golf，續航力由190公里大幅提升至300公里，對好多人嚟講已夠行成個星期，而且最快只需45分鐘便可充電至80%！

Volkswagen e-Golf
售價：$449,980起

續航力大增至300km

隨着e-Golf在本港上市，意味新一代Golf的家族成員已全部到齊。新e-Golf強調續航力提升，咁300公里即是有幾遠呢？理論上可來回柴灣至機場3次，不過計埋開冷氣、塞車咁，相信行200至220公里都沒有大問題。點解咁有信心？試車當日載着3名成年人、開行冷氣，不斷在上上落落的山路行咗29公里，最後錶板顯示的尚可行駛里程只減了41公里，除非大腳大腳咁「畀油」，耗電量並不大。e-Golf的續航力能大增至300公里，原因不僅是用上更大的鋰離子電池，使電量由24.2kWh增加至35.8kWh，還有電動馬達提升功率輸出的同時，仍可維持每100公里12.7kWh的耗電量不變，性能及效率雙雙提升。

若使用40kW綜合充電系統（CCS），只需45分鐘便可充電至八成。

電動馬達的輸出功率有所提升，最大馬力達136ps。

多功能軚環以真皮包裹，後方為12.3吋全數碼儀錶板。

CCS僅45分鐘充電八成

e-Golf的能源回收強度有多段調校，分別為D1、D2、D3及B，當中以B Mode最強，稍為「鬆油」已有類似制動的反應，若非緊急煞車或把汽車完全停定，基本上大部分時間都用不着煞車，一個腳掣已可控制車速，雖然初時有些不慣，不過很快便適應下來。B Mode下，「鬆油」都會令車速大幅拖慢，就算駕駛者沒踏下制動，但只要減速幅度大，車尾煞車燈仍會自動亮起，以策安全。動力方面，最大馬力增至136ps（+21ps），而且起步瞬間便釋出全數扭力，結合反應直接的單速Direct Drive波箱，0~80km/h、100km/h的時間分別縮短至只需6.9秒及9.6秒。充電時間則要視乎充電設施的制式，如充電站採用7.2kW制式，約需5小時20分鐘充滿：當連接40kW綜合充電系統（CCS），只需45分鐘便可充至八成。

後泊鏡頭屬標準配備，並附設Park Distance Control。

後排空間與標準版相若，沒受電池擺放影響。

整合於頭泵把的LED日間行車燈以「C」形設計，屬e-Golf的專屬款式。

標準配置落料重手

新車外觀雖與汽油版沒太大分別，不過要分辨出電動車的身份都唔難，譬如加上藍間飾條的鬼面罩、「C」形LED日間行車燈及專屬的輪圈都是e-Golf獨有標記，還有與別不同的車身套件，好易認。電動車沒有引擎，踩住腳掣、按下汽車啟動鍵，無聲、無震，只見錶板亮起來，相信好多人都有疑問，點樣先知着咗車未？其實，只要留意錶板左下方，見到有綠色「READY」字樣就代表着咗，入波「畀油」就可以無聲無息咁開車走人。至於中控台的資訊娛樂系統，更配上頂級的8吋Discover Media，除可操作通話、音樂播放及導航系統外，還可顯示動力流，廠方另將Vienna皮椅、12.3吋全數碼儀錶板、Park Assist等列為標準配置，落料都幾重手。