文哥喇叭聲援變樣玩App

今年適逢《變形金剛》真人版電影10周年，加上新一集《變形金剛︰終極戰士》將於6月上映，相關產品排住隊登場，老變迷肯定大把機會破財。搶先抵港的有CAMINO推出的Optimus Prime Figurative Bluetooth Speaker，唔單止以Human Size還原柯柏文靚樣，仲內置2.1聲道喇叭及變聲功能，加上可透過App扮文哥，粉絲嘅銀包注定被榨乾！

喇叭採用Human Size比例，大小跟成年人頭部相若，重約2.3kg。<br>售價：$2,999

喇叭採用Human Size比例，大小跟成年人頭部相若，重約2.3kg。
售價：$2,999

真人頭咁大

柯柏文嘅電影造型集集都有少許不同，新一集又玩圓桌騎士又玩亞瑟王，呢款CAMINO藍牙喇叭正以此為藍本，並取得官方授權製作，以成年人頭的Human Size比例打造，無論線條、輪廓、機械部件都相當逼真，金屬舊化塗裝加上發光雙眼，恍如將文哥由電影帶到真實世界。其體積為200×250×300mm，僅重2.3kg，女仔都能輕鬆拎起，去到邊都聽到歌。

文哥的線條及輪廓極其逼真，單是開發便用了9個月時間，效果令人滿意。

備有電源插口、3.5mm Audio及microUSB等介面。

雙眼設有亮燈裝置，可隨意轉換為代表正邪的藍色或紫色。

人聲清澈夠力

喇叭可透過藍牙4.1及3.5mm Audio輸入音樂，利用內置兩組40mm全音單元及一組82mm低音炮，令輸出功率達21W RMS。試聽舞曲《Uptown Funk》，人聲清澈、高音圓潤，低頻輸出紮實不散亂，用來炸機一流。靚聲以外，喇叭仲有很多功能，例如可透過專用App把文哥雙眼轉換為代表正邪的藍色或紫色，又或者改變底座顏色及閃動頻度等。

可透過專用App改變底座顏色及閃動頻率。

AR模式下可影相拍片，並把作品放上facebook呃Like。

內置變聲功能，錄完後會變成機械人聲音效果。

透過專用App可扮成柯柏文，開發商指出程式會偵測面部68點微細變化。

瞬間變文哥

手機專用App還支援互動功能，可利用Face Detection技術把玩家的頭像變成柯柏文頭，繼而自拍或拍片。小記試玩所見，文哥幾乎可與玩家的頭部同步移動，講嘢時更會開合面罩，最估唔到係連人聲都識變，可將錄下的人聲轉成機械人聲，用嚟整蠱人一流。用家還可透過App播放《變形金剛》經典對白、進行定時語音提醒等，預計今年6月28日派貨。