星級攝影媽媽捕捉溫馨回憶
母親節就快到，縱使小朋友尚小不會送禮，但睇住他們一天一天成長，即使是扭計、哭鬧、睡覺，已然是給母親最佳的禮物，當然要用鏡頭記低成長窩心片段。今次一於請身為人母的專業化妝師及攝影師王穎（Wing），教大家點樣運用鏡頭，拍下溫馨的作品。
遠攝鏡加高速追焦
小朋友活潑好動，加上有用唔完嘅精力，追住小朋友影相會感到相當吃力，而且未必會影到靚相，王穎指出：「去到空曠嘅地方，囝囝肯定唔會定定地畀你影，所以可利用大光圈遠攝變焦鏡頭，一來唔需要追住佢都影得到，二來能夠營造淺景深效果，不過要留意背景會否太雜亂。另外亦建議使用有揭背式屏幕的相機，咁影小朋友時就毋須經常彎腰，再配合高ISO加高速快門，甚至可啟動人臉追焦功能，就算佢郁得幾快都依然Sharp，不妨影多幾張補飛，可能影一百張先有一張滿意的作品。」
《Egg》App搞笑自拍
除咗用相機外，現時最常用來抓拍或自拍的始終是手機，不過要吸引小朋友望鏡頭，王穎就有自己的一套方法：「首先要多訓練小朋友，例如我會叫囝囝望鏡頭並加以獎勵，久而久之影相時佢就會習慣望鏡。此外，不妨用球類、畫面、音樂去吸引小朋友的注意力，我自拍時會玩《Egg》手機App，隻App會將個樣變成得意的公仔圖案，囝囝見到會更開心、更投入去影相。」王穎補充，唔一定要張張相都望鏡頭，有時候隨心拍攝先影到既自然又天真的一面。
製作相簿 記載回憶
影小朋友同動物一樣，基本上好難控制甫士和場面，更何況要進一步玩燈光構圖，所以好多時會用到連拍，捕捉一連串動作，務求有一張滿意作品，就算其他相Out Focus或矇查查都唔會刪除，所以大家要預備多一點記憶卡或儲存容量，王穎甚至會將這些相片炮製成實體相簿留念。「我每年都會為囝囝製作一本相簿，記載一家人一年來的生活點滴，拎住實體相簿睇相，比起在電腦或手機瀏覽更加實在，更加顯得珍貴。」網上有不少製作相簿公司，視乎相簿的尺寸、頁數、排版和相片數目，收費由$100至$800不等。
Profile
專業化妝師兼攝影師王穎（Wing），同時亦是知名博客，不時於網上貼出囝囝Max的照片，近年主力攝影大肚相、BB相及家庭相，曾為多位名人拍攝個人及家庭照，包括陳凱琳、葉翠翠、陳爽、張名雅、高皓正、吳文忻、趙海珠、周家蔚、趙哲妤等。
網址：www.facebook.com/wwmakeup/
3大影相「放電」好去處
小朋友的「第一次」，往往值得拍攝留念，因此王穎表示沒有最適合的拍攝地點，何時何地也可能有着值得記錄的一刻。但有些地方適合拍攝親子照之餘，仲可以幫小朋友「放電」，以下就推介港、九、新界3大熱點，嚟緊母親節不妨帶小朋友去影吓相啦！
撰文：黎子豪
部分攝影：陳世昌（部分相片由受訪者提供）