DP-CMX1 Vs G6 Hi-Res流動玩樂

耳機迷聽歌，Hi-Res音樂、靚聲耳機、DAP播放器缺一不可！以往想喺手機享受靚聲，定要接駁流動耳擴，不過帶多舊鐵出街始終不便。好在近年手機嘅音效質素愈趨專業，今次一於以Onkyo GRANBEAT DP-CMX1及LG G6兩部針對Hi-Res音樂而設計的旗艦手機比併，睇吓能否滿足到一眾樂迷！
DP-CMX1設計似足一部DAP，用料紮實。售價：$5,998（a）<br>G6屏幕佔機面面積超過八成，窄邊框效果明顯。售價：$5,998（b）
DP-CMX1設計似足一部DAP，用料紮實。售價：$5,998（a）
G6屏幕佔機面面積超過八成，窄邊框效果明顯。售價：$5,998（b）

DP-CMX1首創DAP手機

日本音響老牌Onkyo出品嘅擴音機、耳機各位可能見慣見熟，但出DAP手機可說是首次。GRANBEAT DP-CMX1今年初喺美國CES展覽亮相，專業DAP設計加上Android手機功能，甫現身即惹來極大回響，早前於日本開賣，水貨被炒至七八千元。如今行貨抵港，香港除了成為首個海外發售市場，定價仲同日本接近（約84,800日圓），誠意可嘉！

DP-CMX1機背右側設有音量旋鈕，方便微調音量。
  • DP-CMX1機背右側設有音量旋鈕，方便微調音量。
DP-CMX1支援雙卡雙待設計，並提供獨立microSD記憶卡槽。
  • DP-CMX1支援雙卡雙待設計，並提供獨立microSD記憶卡槽。

G6旗艦闊屏靚聲

LG上代旗艦手機G5破格玩模組設計，可惜市場唔太受落。今代G6重整旗鼓，無論外形和功能都重新設計，用上5.7吋18:9超闊屏及Quad DAC靚聲晶片，上月喺韓國開賣，首日已賣出超過20,000部，反應唔錯。近日行貨抵港，凡於4月12日開賣日至5月4日期間購買G6，會額外附送一年本地保養及QuickCover鏡面智能保護套，認真賣大包！

G6今代改用玻璃機背，冰晶藍新色加上髮絲紋勁靚仔。
  • G6今代改用玻璃機背，冰晶藍新色加上髮絲紋勁靚仔。
G6支援雙卡雙待，不過SIM 2卡槽與microSD記憶卡槽共用。
  • G6支援雙卡雙待，不過SIM 2卡槽與microSD記憶卡槽共用。

Round 1：鬥Hi-Res音色

DP-CMX1同G6都係Sell靚聲，皆因兩機都內置DAC解碼晶片，前者用上雙ESS ES9018C2M及雙HP-AMP 9601K耳擴晶片，後者則選用ESS ES9218+ Quad DAC，同樣支援Hi-Res音樂格式。小記請Let's Go Audio音響店長Anthony試聽，佢用咗聽慣嘅Onkyo IE-C3三單元CM耳機播放24-bit 96kHz WAV高清音樂。「兩部手機都毋須擔心唔夠力推耳機嘅問題，DP-CMX1雙DAC加雙AMP設計，聽起來嘅音色更接近原音，人聲演繹得好好，表現唔會輸畀萬元級數嘅DAP。而G6聽上去有較重音樂感，中低音表現突出，音樂輸出明顯強化。」

DP-CMX1音樂介面非常專業，可透過旋鈕調校音量等設定。
  • DP-CMX1音樂介面非常專業，可透過旋鈕調校音量等設定。
WIN<br>提供一系列進階模式，特設「窺視預防」將Album圖片變暗。
  • WIN
    提供一系列進階模式，特設「窺視預防」將Album圖片變暗。
G6播歌介面設計相對簡單，特色功能欠奉。
  • G6播歌介面設計相對簡單，特色功能欠奉。
用家可選擇開關Quad DAC，音量亦可逐級微調。
  • 用家可選擇開關Quad DAC，音量亦可逐級微調。
Let’s Go Audio音響店長Anthony發覺兩款手機都推得郁Onkyo IE-C3耳機，毋須額外加耳擴都可享受靚聲。
  • Let’s Go Audio音響店長Anthony發覺兩款手機都推得郁Onkyo IE-C3耳機，毋須額外加耳擴都可享受靚聲。
試播Netflix影片《Marco Polo》，G6（下）的畫質明顯細緻得多，而且18:9闊屏令睇片時可Full Screen飛走黑邊，串流效果流暢自然。
  • 試播Netflix影片《Marco Polo》，G6（下）的畫質明顯細緻得多，而且18:9闊屏令睇片時可Full Screen飛走黑邊，串流效果流暢自然。

Round 2：鬥串流睇片

唔少用家習慣喺手機串流睇片，究竟音效經過強化嘅DP-CMX1及G6有冇分別？Anthony以兩機串流Netflix影片《Marco Polo》，他表示：「DP-CMX1會聽得出現場感重啲，指向性較為明顯；G6開啟Quad DAC後音效細節會明顯啲，現場感亦有所提升。」畫質方面，DP-CMX1嘅5吋全高清屏幕質素都唔差，但比起G6擁有5.7吋2K屏幕，後者無論細緻度和對比度都明顯佔優，而且G6用上18:9 FullVision屏幕，支援Dolby Vision及HDR10技術，播放對應的影片有助提升畫質。

Round 3：鬥特異功能

其他功能方面，DP-CMX1喺機身加入了不少DAP功能，包括2.5mm平衡輸出端子、61級音量旋鈕，機側還有實體播放鍵等。而G6喺傳統手機外形下強化耐用度，符合IP68防水防塵標準及通過美國軍用標準MIL-STD-810G摔落測試，粗用都唔使怕。至於影相方面，DP-CMX1及G6分別備有1,600萬像素及1,300萬像素鏡頭，睇像素好似前者佔優，但實拍時發現G6的雙鏡頭設計支援125度廣角，無論成像質素和色彩表現都較佳。

DP-CMX1試相：相片呈4:3比例，成像畫面稍為偏綠，至於細緻度屬中上水平。
  • DP-CMX1試相：相片呈4:3比例，成像畫面稍為偏綠，至於細緻度屬中上水平。
WIN<br>G6試相：1,300萬像素雙鏡頭支援125度廣角，拍攝風景超Wide！
  • WIN
    G6試相：1,300萬像素雙鏡頭支援125度廣角，拍攝風景超Wide！

總結：DP-CMX1啱樂迷 G6攻玩家

DP-CMX1及G6兩機的行貨定價相同，亦同樣主打靚聲功能，但比較之下會發現針對嘅客路各自不同，DP-CMX1主攻發燒級樂迷，兼容規格及音色表現直逼一眾DAP產品，配合手機功能可即時下載Hi-Res音樂及高清影片，可以話一步到位。而G6就傾向多功能聲畫娛樂路線，如果玩家希望擁有一部睇片、聽歌、影相等每個範疇都有高水準表現嘅手機，G6就啱晒你！

DP-CMX1規格表

制式：GSM、WCDMA、FDD-LTE

處理器：Qualcomm Snapdragon 650

記憶體：3GB RAM、128GB ROM、支援microSD

屏幕：5吋（1,920×1,080解像度）

鏡頭：（前置）800萬像素、（後置）1,600萬像素

對外連接：藍牙4.1、802.11ac、microUSB

電池容量：3,000mAh

作業系統：Android 6.0

體積：142.3×72×11.9mm

重量：234g

G6規格表

制式：GSM、WCDMA、TD-SCDMA、FDD-LTE、TDD-LTE

處理器：Qualcomm Snapdragon 821

記憶體：4GB RAM、64GB ROM、支援microSD

屏幕：5.7吋（2,880×1,440解像度）

鏡頭：（前置）500萬像素、（後置）1,300萬像素×2

對外連接：藍牙4.2、802.11ac、NFC、USB Type-C

電池容量：3,300mAh

作業系統：Android 7.0

體積：148.9×71.9×7.9mm

重量：163g

撰文：林子聰

攝影：張群生、郭凱敏

查詢電話：（a）2553 1151、（b）3543 7777