單車手實測！Lumos智能頭盔 LED感應着燈
俗語話「又要威，又要戴頭盔」，估唔到本地初創公司設計嘅Lumos智能單車頭盔真係威出國際，一推出就勇奪英國設計博物館（The Design Museum）頒發嘅「Beazley Design of the Year」交通設計獎，成功擊敗Tesla等眾多對手獲得殊榮。今次實物抵港，梗係要第一時間搵踩車高手兼前香港落山單車代表徐震球（Ball）實測。
設有指示燈及煞車燈
於Kickstarter成功集資的Lumos智能單車頭盔，在歐美地區一推出就賣出15,000個，之所以咁受歡迎，全因佢設計破格，前後均設有LED指示燈，能夠利用藍牙遙控器操作，轉向時頭盔可閃動左右指揮燈，加上遙控器內置速度感應器，每當單車減速或煞車，頭盔便會自動亮起紅色「Brake燈」，等後隨車輛知道你收油，啱晒鍾意喺公路踩車或者踩夜車嘅人士。Ball表示：「頭盔操控便利，而且遙控器可安裝到單車手柄上，就手之餘不難操控，指揮燈的反應亦算靈敏。」
支援3種亮燈模式
頭盔的LED燈提供常亮、慢閃和頻閃3種模式，實測時即使距離遠至50米都睇得清楚，加上只要充電30~45分鐘，便能使用3小時（長亮模式）至6小時（閃燈模式）。Ball指出：「頭盔的LED亮度充足，加上其位置比安裝在單車架的LED燈高得多，令到轉向和煞車警示更清晰，路人或駕駛人士都很易看到，有效提升安全性。」不過他試戴後發現，頭盔的內籠可能為迎合歐美人士頭形，兩側較為窄身，亞洲人佩戴會略為緊，加上其用料密度較高，縱使有着堅固的優點，但撞擊吸震能力會稍稍降低。
撰文：黎子豪
攝影：胡振文、莫文俊
查詢電話：9272 8919