早買早享受！5吋DP-CMX1 樂迷Phone搶

日本音響廠Onkyo向來主力研發擴音機、家庭影院等，估唔到最近踩過界推出智能手機GRANBEAT「DP-CMX1」，由於內置Hi-Res音樂播放功能，喺日本一推出就被發燒友瘋搶。近日有小量水貨流入本港，實測操作似足DAP咁方便，音色仲有高水準表現，雖然炒到七千幾元是貴了一點，但行貨傳聞要等到3月底才推出，樂迷梗係早買早享受啦！

售價：約$7,680

操作似DAP

先睇外形，DP-CMX1跟時下嘅智能手機有很大分別，機身厚達11.9mm，重量有234g，方正設計頗為笨重，真係唔算靚仔。而5吋屏幕用上1,080p解像度IPS材質，雖然畫質細緻，但顏色略嫌偏淡。另一不同之處是播歌操作方面，播放/暫停、上一首、下一首備有實體按鍵，並加入音量轉盤，操作似足同廠DAP咁方便。機側更設有HOLD掣，啪着後會將屏幕鎖上，避免誤觸而影響音樂播放。

雙解碼晶片

細看機背可見「TWIN DAC」字樣，這正是它最大賣點，內置兩顆ESS ES9018C2M DAC解碼晶片，以及兩顆SABRE 9601K AMP放大晶片，有效放大音源信號，加上音效晶片被焊在一個專用基板上，與主機板分開以減少干擾，無論用料及設計都達發燒級數，音色自然有保證。而且它兼容DSD 11.2MHz及24-bit 384kHz PCM高清音樂，支援AIFF、ALAC、 FLAC、WAV、Ogg-Vorbis等無損音樂格式，以後聽歌唔使轉檔咁麻煩。

備有實體播放及跳播鍵，最右邊的HOLD鍵（箭嘴示）則用於鎖上屏幕。	碳灰色磨砂機背，設有1,600萬像素主鏡頭及獨立調音轉盤。	兼備2.5mm及3.5mm雙輸出介面，輕鬆推動鑑聽級耳機。
可插雙SIM卡，並支援最高256GB microSD。	提供進階設定，左右平衡、數碼濾波及最高音量都可調校。	插入耳機後可選擇型號，系統會為自家耳機作出優化。

音色清晰通透

一般手機只配備3.5mm耳機介面，新機則加設2.5mm介面，同時支援75mW及150mW輸出功率，就算鑑聽級耳機都推得郁，將單元分析力發揮至極限。實際試聽MOOV內的Adele《Hello》@Hi-Fi音質，高音人聲清晰通透，在升頻補償下，明顯聽到一般手機表現不到的背景細節。其他音樂功能包括關掉無線通訊達致無干擾音質、調校左右平衡，以及為自家耳機提供優化音色等。至於手機規格則屬中上檔次，Snapdragon 650處理器配3GB RAM，並支援QC3.0快速充電技術及雙卡雙待。