國產R9s神速閃充

除咗Lenovo、小米等已經上位嘅國產大牌，近年有唔少內地手機品牌彈起，當中OPPO喺中港台都有唔錯評價和銷量。最近又有新機R9s由水路抵港，引進招牌嘅「VOOC閃充」快速充電技術，廠方表明充電5分鐘就可通話2小時，究竟實際有冇咁高效率？它與傳統Quick Charge充電技術有何分別？一試便知龍與鳳。

R9s
售價：$3,080

雙卡雙待全網通

OPPO近年喺手機、播放器等市場做到有聲有色，R9s可說是手機最新力作，5.5吋全高清屏幕配以直板弧邊機身，機面下方植入指紋按鍵，連機背鏡頭以至金屬磨沙質感，感覺與iPhone 6s Plus十分相似。配色方面除咗今次測試嘅黑色，另有金及玫瑰金色，嚟緊仲會加推紅底黑面嘅新年特別版，夠晒應節。

硬件方面則屬中階級數，搭載Qualcomm Snapdragon 625處理器及4GB RAM，運行Android 6.0系統及自家ColorOS 3.0介面，實試上網、打機都算流暢。另支援雙卡雙待，惟SIM 2需與microSD卡共用。幸好新機兼容全網通，可用盡香港和內地的3G及4G網絡，適合經常往返中港兩地的人士。

機底設有喇叭，音量輸出夠大兼唔拆聲。

支援雙卡雙待，不過SIM 2需與microSD卡二選一擺放。

機背設計與iPhone 6s Plus有九成相似。

充電技術單挑大廠

新機其中一大賣點係「VOOC閃充」技術，它與一般將電壓提升至9V或12V的快速充電技術不同，「VOOC閃充」是將電壓輸出維持在5V，但可做到4A電流輸出，廠方表示充電時能做到更低電壓及更低溫度，一邊充電一邊玩手機都唔會有危險。至於充電速度，小記搵嚟分別支援Adaptive Fast Charging嘅Samsung Galaxy C9 Pro，及Quick Charge 3.0快充技術嘅LG V20同場測試，三機將電量耗盡之後，分別充電5分鐘，R9s電量已經充回9%，而Galaxy C9 Pro及V20就同樣充回6%；充電30分鐘後，R9s已充至63%，而Galaxy C9 Pro及V20分別充至38%及43%。而且用R9s嚟傾電話，講足成個鐘都只跌了4~5%電量，證明「VOOC閃充」確實有料到，遇着夜晚瞓覺唔記得充電，第二朝起身都可極速「補給」，非常實用。

快速充電時，屏幕會顯示「VOOC」字樣以資識別。	內置《手機管家》，可自動清理系統垃圾、掃描病毒。	拍攝功能齊全，包括濾鏡、專業模式、美顏等。
使用「VOOC閃充」時需要用上原廠充電器及線材，小記試過用其他充電器唔Work！	指紋辨識器最多可加入5組指紋，除了解鎖開機，還可將指定程式加密。	備有1,600萬像素F1.7大光圈鏡頭，支援光學防手震技術。
試相區日光下以自動模式拍攝，測光準確，細節盡現，色調與真實環境接近。

快速充電知多啲

近年大部分手機處理器都支援快速充電技術，例如Qualcomm、MediaTek出品嘅處理器，都有自家Quick Charge、Pump Express快充技術，透過提升變壓器的電壓以縮短充電時間。充電速度方面，以Qualcomm的Quick Charge為例，分別有1.0、2.0、3.0及已公布的4.0版本，廠方表示Quick Charge 4.0理論可於15分鐘充回50%電量。

MediaTek推出的Pump Express技術雖然已經發布，不過暫時較少機款支援。	Samsung Galaxy C9 Pro的快速充電技術名為Adaptive Fast Charging，屬Quick Charge 2.0規格。	LG V20屬其中一款支援Quick Charge 3.0技術的手機。
充電表現參考