波鞋達人教你分真假

留意細節免招損失

今回請來波鞋潮店SoleFly兩位主理人Deano及威廉，教大家分辨adidas YEEZY BOOST 350 V2 Beluga同Nike Air Jordan 11 Space Jam兩對近期最多人想要，但又最多假貨的大熱款式。由於兩個鞋款分別有多個要注意的細節位，奉勸大家如果見到其中一個位同以下所講細節有分別就無謂博，以免招致損失。

adidas YEEZY BOOST 350 V2 Beluga

放大圖片	鞋內MADE IN CHINA標籤中的「A」字與「D」字緊貼，MALE當中的「A」字與「L」字緊貼。	內側橙色點紋分布平均。
後踭橙色間紋沒有過中界。	鞋底BOOST質感夠彈性。	鞋墊側邊「YH-0010」與「7-8」之間無點。
鞋頭橙色間紋不會去到鞋尖。

Nike Air Jordan 11 Space Jam

放大圖片	取出鞋墊後，鞋籠應該有俗稱「鋼印」的編碼數字，而縫線亦整齊緊密。	鞋墊底部有膠水紋及字體。
鞋墊AIR字體粗幼整齊。	從後方看鞋形應該上窄下闊，留意漆皮位置距離應該較高。	膠鞋撐編碼數字沒有方框。
鞋盒尺碼貼紙上的字母及數字之間有統一字距，注意「3」、「6」、「7」、「8」及「9」字最常出錯。

真盒假鞋

好多人中伏買到假鞋就係因為心急走漏眼，所以有不法商人諗到用「真盒假鞋」呢招，甚至將真貨所用的配件如：鞋撐及包裝使用的「雪梨紙」抽起，換到另一對假鞋上出售。為加強說服力甚至會配上真的購買單據，因此於網上平台不時會見到有人出售鞋盒連配件。

入手時唔好淨係顧住檢查對鞋，鞋盒同配件一樣要認真檢查。

本港其中一間運動用品店允記亦曾經受假單據之害，因此官方帳戶就列出多個錯位，以減低大家中伏機會。

順帶一提，內地好早已經有出售假的單據，資料有時正確無誤、有啲就錯漏百出，但共通點就係全部都印得好清晰，而且資料對晒位，所以如果想進一步確認賣家所售波鞋為正貨，不妨要求對方出示購買確認電郵甚至郵遞貨單。

假波鞋網

假鞋氾濫的情況下亦引伸出好多假波鞋網，通常呢類波鞋網站都會齊款齊Size，好多時仲會做特價，另外成個網頁大多會採用英文，當然所寫的都可能係一啲左抄右抄的資料介紹；但只要留意網址、聯絡方式（見到內地+86字頭可以話超過99%係假）同謹記便宜莫貪，咁就唔會咁易中伏。

炒款有得減價已經夠奇，更奇嘅係全個網站都用英文顯示，但聯絡電話竟然係「+86」內地電話字頭，電郵亦只係採用Gmail，而非同網站名稱一樣的註冊電郵。

只要你見到網站齊款齊碼仲有得平的話，其實都毋須猶豫直接交叉個網頁就算！

上網查證

如果想入手的波鞋係購自網上賣家的話，在確認購買前可嘗試去YouTube搜尋分辨該鞋款真假的Video睇吓；用Legit Check或者Fake等字眼加上你想買的波鞋名稱及型號去Search，基本上都會搵到好多；再唔係上內地某知名購物網站搜尋鞋款，記下假鞋特徵以作對比亦可。如果想再三確認真假，可以要求賣方提供近距離拍攝的細節位照片，交收前於不同波鞋論壇、社交群組（如：跳跳人研究室及KICKZ-LAB波鞋討論/報料區等等）開個Post叫各位師兄幫吓眼，通常禮貌查詢都可以得到回覆。如果買的是二手波鞋更加要留心，因為某些識別真假的細節位經着用後已經變得不明顯，所以如有懷疑就寧願唔好買。

YouTube上有大量外國分真假Video畀大家作參考。

出外靠朋友，買鞋靠師兄，禮貌查詢通常都得到師兄的回覆。

撰文：賴文曦

攝影：陳世昌