穩步向豪Mazda6 GVC 2.5

近年Mazda的新車愈來愈有水準，用料及設備都豪得令人難以置信，好似最近推出的Mazda6 GVC i-Plus咁，19吋軨、BOSE音響就必然有（口架）喇，點估到會有埋電尾簾、雙層隔音玻璃及一系列的I-ACTIVSENSE主動安全科技，用料簡直係大超班，三十多萬元有咁嘅享受，喺其他品牌都幾難搵！

Mazda6 GVC 2.5
售價：$315,000起

GVC減低彎道車身搖晃

Mazda6 GVC車名中的「GVC」（G-Vectoring Control）是一項由Mazda開發的G-Force導引控制技術，其作用不僅是提升行車穩定性，還可減低駕駛疲勞。解釋原理前，不如先諗吓自己平時點樣過彎，係咪先減速、入彎，然後加油出彎？相信大多數人都係咁，但有冇留意到每當收油、轉向或加速時，車身都有不同程度的搖晃呢？GVC的開發重點就是要減少這些重心轉移，藉着控制引擎的扭力輸出來實現行車更順、更舒適的效果。廠方指，GVC的原理是入彎時先減低引擎扭力，使重心前移來提升過彎反應，到出彎時才將先前被降低的扭力回復，令重心後移來增強車尾穩定性，使四輪在適當時間有更佳下壓力，達至提升乘坐舒適度及行車安全的目的。

新設計的軚環外圍直徑維持不變，但縮小了中央部分。

座椅用上Nappa皮革包裹，比起普通皮更柔軟。

i-Plus版本裝配11個BOSE喇叭，並附有RDS功能。

用料上乘顯露貴氣

Mazda6一代比一代豪，全新Mazda6 GVC更已從過往的純動感路線走向豪華化，追求的不再限於運動操控，還具備高級行政房車的格調，唔止內籠夠晒大，今次測試的i-Plus版本還包埋原廠Nappa皮櫈，坐落比普通皮更柔軟及富質感，不過最Impressive的地方還是車廂的隔音，行車時靜到成部歐洲豪房咁。點可以做到咁？原來，原廠除了在車身增加了吸音及減噪物料外，前門更少有地換上加厚的雙層隔音玻璃，會否太誇張了吧？其實，很多車廂不起眼的細部設計都同樣細心，如前座中央手枕內的儲物櫃，內壁便用上軟綿包裹，雜物再不會如以往撞到膠殼而發出聲響，尾玻璃更設有電動簾，係咪估佢唔到呢？

車頂換上全黑色內襯，而且設有電動天窗。

尾玻璃設有電動遮光簾，入後波時會自動降下。

中央手枕儲物箱包上軟棉內壁，減低雜物撞到膠箱發出的聲響。

慳油好力性價比高

Mazda的SKYACTIV引擎十分慳油，好似Mazda6 GVC 2.5的直四汽油引擎咁，每公升油便可行駛14.1km，馬力更高達192ps，節能毋須以性能作代價，多好！I-ACTIVSENSE是Mazda的嶄新主動安全科技，輸港的i-Plus版本包含智能照明頭燈、自動緊急煞車、防止車道偏離及駕駛者注意力警示等，試問市場上有邊幾部日本車做得到？2016 Mazda6 GVC的改動並不止有以上幾點，Head-up Display及錶板顯示屏都已由單色轉為彩色，並換上新式軚環及側鏡，至於過往的軚環轉波撥片、電動調校記憶座椅、天窗、自動防眩倒後鏡、前後泊車感應連後泊鏡頭仍屬於標準配備，部車豪到咁，論性價比點有得輸？

放大圖片	中控台設有彩色屏幕，而且可選配導航系統。	MID顯示效能亦得到升級，右方儀錶由以往的單色顯示轉為TFT LCD。
引擎可輸出192ps馬力，而且耗油量低。	i-Plus版預載了I-ACTIVSENSE多項主動安全科技，為乘客帶來更充分的保障。