115cm定翼Disco FPV如鷹展翅

750g超輕機身

定翼機嘅用料主要分為木、發泡膠、玻璃纖維及碳纖幾種，Disco機身至機翼均以EPP發泡膠打造，再用碳纖管強化剛性，展翼後足足有115cm咁長，重量卻只有750g，加上備有32GB內存，可利用鏡頭拍攝1,080p影片。出街玩無人機最忌冇電，玩唔夠一陣就被迫降落都幾冇癮，所以玩家經常會帶多幾枚電池傍身，之但係Disco就冇呢個問題，阿丁解釋：「由於Disco能以氣流滑翔，雖然廠方提供的連續飛行時間約45分鐘，但我自己試玩超過一個鐘都冇問題，續航力比一般四軸機強得多。」

航拍達人兼Zeta數碼專門店店長阿丁按下一鍵起飛鍵，待摩打運行後單手將Disco拋出。	Skycontroller 2遙控器唔單止設有手機夾，仲支援一鍵起飛和降落功能。	阿丁戴上跟機嘅Cockpitglasses眼罩，再將App切換到VR模式便能體驗FPV飛行。
機身和機翼採用EPP發泡膠打造，接合位加入碳纖管固定。	底部設有超聲波感應器，主要用作低空定位。	紅色部分嘅Parrot C.H.U.C.K.可說是全機大腦，內置速度計、陀螺儀、GPS定位等裝置。

手拋起飛設計

Disco內建Parrot C.H.U.C.K.電腦系統，植入了超聲波感應器、速度計、陀螺儀、GPS定位等功能，而且Skycontroller 2遙控器具有一鍵起飛和降落功能，相當易上手。阿丁指出：「Disco唯一做唔到懸停動作，最多只能在天上盤旋，所以起飛同降落方式同四軸機好唔同，起飛時要用手拋出去，飛行速度最高可達每小時80公里，降落亦都唔係直接下降，而係會盤旋再Hard Landing剷落地，所以玩機時最好挑選附近有一大片草地，以減低衝擊對機身造成的影響。」

眼罩可放入4.7吋至5.7吋手機，使用時需要以手機線連接遙控器。	機頭嘅開關掣內建指示燈，從而顯示連接狀態。	主要以機尾嘅螺旋槳推動，藉着氣流滑翔最高時速可達80km/h，至於降落時會以反向減速。

附送VR眼罩

此機另一賣點是附有一副Cockpitglasses眼罩，玩家將手機插入其中，並開啟《FreeFlight Pro》App便能玩到VR模式，以第一身享受猶如飛在空中嘅沉浸式體驗。手機還可切換視點，即是玩家可透過手機鏡頭，睇到前方景物，咁就唔使將眼罩除嚟除去。阿丁表示：「喺戶外猛太陽底下，如果就咁用Skycontroller 2遙控，好多時都睇唔清楚手機屏幕嘅畫面，用Cockpitglasses眼罩以FPV去玩，就能夠避免以上情況，睇落會舒服好多，但係戴咗眼罩就望唔到無人機嘅位置，所以航拍初哥需要一啲時間適應。」

鏡頭內建三軸防震系統，能夠拍到1,080p高清片及1,400萬像素相片。	透過《FreeFlight Pro》App能夠實時看到無人機畫面，更會顯示高度、速度等資訊。	試片區 從影片中擷取影像，可見畫面銳利度和對比度唔算好高，不過大草地和背景嘅輪廓都睇得到，顏色亦算豐富。

撰文：黎子豪

攝影：莫文俊

查詢電話：2688 5366