DTEK50玩轉Android 保安一哥

今時今日，都市人對住手機多過電腦，偏偏電腦保安軟件一大籮，手機卻如無掩雞籠，尤其連接公眾Wi-Fi或開啟可疑檔案時，黑客就能輕易竊取用家資料。唔想咁樣，買部保安嚴密嘅智能手機就最穩陣，BlackBerry近日推出號稱「全球最安全Android手機」嘅DTEK50，安全狀態、程式權限等一目了然，二千幾蚊就能買個安心！

售價︰$2,688

「去莓」更徹底

BlackBerry近年與Google愈走愈埋，可用Android Apps的Leap，以及首部Android手機PRIV於去年先後面世。DTEK50是廠方與Android的第二部結晶品，「去莓」更加徹底，踢走實體QWERTY鍵盤之餘，進一步把屏幕加大至5.2吋。雖然驟眼睇落去失了黑莓味道，但全高清屏幕下，辦公上網或娛樂睇片更加過癮，而且虛擬鍵盤面積適中，配合「單詞建議」打字利落就手。顏色則沿用黑色作主調，機背加入防滑膠粒，設計用料一貫紮實。

可疑行為現形

被廠方譽為「全球最安全Android手機」，保安功能自然非一般公版新機可比，例如它會定期提供系統安全修補，以保護裝置免受惡意程式入侵。當「安全啟動」運作時，安全啟動鏈會驗證手機內的組件是否完整，確保手機自上次重新啟動後未有被改動；假如手機被盜，更會以加密程式保護個人資料。不過小記最欣賞還是《DTEK》工具，用戶可從中看到不同Apps的權限和風險，例如哪一隻App不停存取GPS位址，哪一隻無故開啟鏡頭等，存取時間及地點全部睇得番，可疑行為無所遁形。

新機用上5.2吋屏幕及Android 6.0系統，植入《DTEK》評估系統安全性。

新機用上5.2吋屏幕及Android 6.0系統，植入《DTEK》評估系統安全性。

防滑機背設有1,300萬像素主鏡頭。

備有4款專用保護套供選購，材質各異，售價待定。

保留招牌工具

雖然改玩Android 6.0，但黑莓的招牌工具並沒有消失，當中唔少得通訊軟件《BBM》、整合社交帳號嘅《BlackBerry Hub》及轉移資料用的《BlackBerry裝置切換》等，照顧不同用家需要。奈何一分錢一分貨，它的硬件着實唔標青，Snapdragon 617八核處理器、3GB RAM及16GB ROM只達中階機標準，1,300萬像素主鏡頭對焦快可惜雜訊偏多。要讚的反而是機側快捷鍵，只要輕輕一撳便能開啟預設程式、工具或轉至靜音模式，單手操作話咁易！

屏幕設有「索引標誌」，手指一拉便能快速啟動行事曆、聯絡人或電郵。	機側特設快捷鍵，輕輕一撳即啟動預設程式或小工具。	只能插入一張SIM卡，旁邊的記憶卡槽支援最高2TB microSD。
提供反色、清新、漸暈等大量相片濾鏡，具一定玩味。	清楚顯示各Apps存取的時間、次數及GPS位址。	預設智能鍵盤，會根據過往輸入模式提供單詞建議。