手機遙控FPV Ghostdrone 2.0航拍「睇」感

頭部體感控制鏡頭

EHANG（億航）呢個牌子很多人都未聽過，但各位有留意今年CES展覽會的話，應記得廠方曾展出過全球首部可載人的無人機EHANG 184。今次Ghostdrone 2.0以玩味為主，佢唔似一般無人機需要經屏幕取景，用家只需戴住VR眼罩，即可睇到鏡頭嘅第一身畫面，而且眼罩分別設有2.4G數據傳送及5.8G圖像傳送，傳輸範圍可達一公里。最好玩係眼罩支援頭部追蹤功能，只要抬頭或低頭，無人機嘅鏡頭就會跟住上下移動，可惜鏡頭冇得左右郁，如果唔係就真係好似第一身飛緊咁好Feel。另一點要留意係佩戴眼罩時，玩家望唔到無人機嘅位置，加上機身不設避障功能，所以建議喺空曠嘅環境玩較安全。

玩家可透過《EHANG Play》手機App遙控無人機飛行及拍片。	Ghostdrone 2.0旗艦版配備4K球形鏡頭雲台，能夠攝錄4K@30p影片及1,200萬像素相片。	電池續航力達25分鐘，而且備有顯示屏列出電量。

《EHANG Play》手機操作

新機另一噱頭是毋須專屬遙控器，只要利用手機即可操控無人機。小記試玩時先在手機下載《EHANG Play》App，當進入Avatar Mode後，將手機前傾或後斜，無人機就會跟住前後飛行；而手機左右傾斜則會左右轉向飛行；至於飛高飛低就要按App中間嘅升降鍵，同步率和反應都相當高。不過玩玩吓有電話打入嚟或者冇電點算好？Ghostdrone 2.0一旦斷線，就會在空中自動懸停，而且冇電時會自動返航降落，咁就唔驚「炒機」。

戴上VR眼罩便能以第一身睇到FPV影像，加上內置頭部追蹤功能，鏡頭會跟住頭部動作上下移動。	體感操作時只要傾斜或旋轉手機，便能夠控制無人機的移動方向。	在《EHANG Play》App中可選擇Touch-to-Go Mode或Avatar Mode，前者以篤芒飛行，後者以體感操控。

4K球形鏡頭拍片穩定

玩得無人機拍片應該好注重質素，新機配備4K球形鏡頭，能夠拍到4K＠30p、2.7K＠60p、1,080＠120p不同解像度影片，加上三軸雲台設計，具有極高穩定性。惟要留意使用VR眼罩取景拍攝時，個頭唔好亂咁郁，否則拍出嚟嘅影像會搖來搖去。而且其四軸設計同市面上嘅同類產品有啲唔同，皆因它採用下旋翼設計，即係四個摩打同螺旋槳設於下方，要翻轉部機才可安裝螺旋槳。至於GPS、一鍵起飛/降落、一鍵返航、跟隨模式等功能一應俱全，航拍新手都可以輕鬆上手。

規格表

拍攝畫質：最高4K@30p（影片）、最高1,200萬像素（相片）

鏡頭視角︰93度

電池容量︰4,500mAh

飛行時間：25分鐘

重量︰1,150g

同場加映：Ghostdrone 2.0 4K版

其實Ghostdrone 2.0除了旗艦版，另有較便宜嘅4K版，分別在於後者沒有VR眼罩之餘，亦非採用4K球形鏡頭雲台，改為裝上EHANG自家運動相機，能夠拍到4K@25p影片，還可自行換上GoPro作升級。

查詢電話：3619 6500

撰文：黎子豪

攝影：張群生