水漾型藍AQUOS Xx3揈機換App

早年Sharp出過唔少叱咤手機界嘅Feature Phone，GX22、SX833等經典就算未用過都應該見過。廠方早前正式被台灣鴻海科技集團收購，正當粉絲們擔心日系AQUOS手機會否從此消失，夏季新機Xx3便登場闢謠，備有金屬邊框、弧面玻璃及水藍新色，配以IPX5/8防水標準，啱晒今個夏天用。

售價：$5,780

Aqua Blue迎夏日

AQUOS系列向來鍾意玩無邊框設計，Xx3卻一改造型，以直板圓角加光面機背，配以鋁合金邊框，坦白講一啲都唔似瀛Phone，幸好做工依然有水準，還在黑、白配色以外，加入Aqua Blue水藍色，夏天睇見都覺得涼浸浸。而機側右邊備有獨立指紋辨識器，小記以右手揸機時，拇指剛好按到，用家仲可設定指紋解鎖捷徑，解鎖同時開Apps，非常就手。

強化體感操控

日系手機不時會加入體感操作，AQUOS Xx3都唔例外，其中嘅Twist Magic功能，只要將機身左右揈即可切換至上一個開啟嘅App，咁就唔使喺Recent Apps入面左撳右撳。而ScrollAuto喺指定頁面一掃即可啟動自動捲頁功能，仲有捲動速度可供調校，支援瀏覽器、Gmail、電話簿等。至於同系旗艦機都有嘅Grip Magic，新機一樣玩得到，用家手握機身便能將屏幕喚醒、將來電鈴聲音量收細等。

內置VeilView防窺模式，唔怕畀隔籬位嘅八卦精偷睇。

將手機左右揈便能切換至上一個使用嘅App。

新增ScrollAuto功能，睇內容豐富嘅網頁可自動捲頁。

旗艦級軟硬件

硬件方面，新機搭載Qualcomm Snapdragon 820處理器及3GB RAM，效能與旗艦機款睇齊，連軟件都預載了Android 6.0，新功能好似Now on Tap智能搜尋、microSD轉為ROM等一概有齊，大廠出品都未必有得玩。不得不提新機仲有GR certified嘅2,260萬像素主鏡頭，不但啟動速度超快，而且對焦、測光亦見準確，相片畫質細緻，用嚟Snapshot一流。

後置鏡頭右邊備有閃光燈及體感感應器。	見地採用獨立指紋辨識器，位置相當就手。	備有nanoSIM及microSD卡槽，而塑膠保護蓋加入金屬紋。
機底備有無蓋式USB插口，左右分別為喇叭及手機繩孔，機側還設有LED提示燈。	ShrinkScreen可將畫面縮細以便單手操作。	內置大量拍攝模式，包括自動、手動、高速拍攝等。