商場睇車樂

近月全港受到俗稱小黑蚊的蠓為患，編者開車一家到郊外遊玩，唔使問阿貴梗係咬到手痕腳痛。就連到油站入油僅幾分鐘，手臂都被咬了腫起六、七塊，最慘是惡蠓冤魂不息跟埋上車，如此困獸鬥地駕駛其實都幾危險。為免成為蠓的食糧，加上天氣開始炎熱，惟有與鄉郊及公園等地暫別，一家轉往商場活動。編者落「場」睇車並非隨便走一趟，吃喝玩樂便算，反而是有計劃地去主辦了車展的商場，目的是與比編者更車癡的兒子一起去睇車。起初太座不以為然，但連續兩星期睇車便開始有微言，不過當她看到不足五歲的兒子坐上展車駕駛席，扭軚、打燈、開水撥及嘗試伸長一雙小腿去踩腳踏，立時悶氣全消。最要命是兒子嚷着：「阿妹坐我隔籬，爸爸媽媽坐後面，我車你哋去玩。」做媽媽當然開心都來不及，立即替兩兄妹影相拍片，玩得不亦樂乎。至於編者欣賞新車之餘，還會看看代理舉辦車展情況。其中smart早前在荃灣一個大型商場的車展便辦得有聲有色，猶如小型嘉年華。除了新車吸引，還大派汽球、爆谷，更設吹氣彈床讓小朋友玩耍等。全場氣氛兩個字：「熱鬧！」如果沒有時間去商場睇車展，可以睇今期《汽車世界》特別號及on.cc東網，便可飽覽Infiniti Q30、Volkswagen Touran及Passat等介紹及試車報告。至於今個星期你會在哪個場遇到編者呢？