雙鏡頭P9影出真‧奶味

德國Leica一向係相機界嘅名牌，皆因拍攝質素超掂，兼且有獨特嘅相片色調。Huawei新旗艦手機P9特別植入與Leica合作研發嘅1,200萬像素雙鏡頭，分別用作拍攝黑白及彩色影像，影出來甚有俗稱「奶味」嘅Leica風格，機價$3,880起唔算貴，有得諗喎！

售價：$3,880（標準版）、$4,480（加強版）

黑白彩色分工

P9嘅焦點當然係同Leica合作研發嘅鏡頭，機背更印有Leica Summarit系列字樣，可說是信心保證。1,200萬像素鏡頭喺數字上唔算突出，但卻加入雙鏡設計，以往雙鏡手機其中一個鏡頭多用作計算拍攝距離，今次P9嘅雙鏡均具備拍攝功能，左邊鏡頭用作拍攝黑白影像，吸光能力較強，可以捕捉更多景物細節；右邊鏡頭則用作拍攝影像色彩，令色彩還原度更高。廠商話影相時鏡頭會以分工形式進行，最後再將相片進行合成，令成像細緻與色彩兼備。

P9加強版用上金色機身，土豪感覺更濃。

Leica Summarit系列雙鏡頭，左邊用作拍攝黑白影像，右邊則捕捉彩色影像。

Leica Summarit系列雙鏡頭，左邊用作拍攝黑白影像，右邊則捕捉彩色影像。

支援雙卡雙待，留意其中一個卡槽由microSD及nanoSIM共用。

採用USB Type-C插口，買周邊配件時要留意。

標準版鋁合金機背提供銀、灰兩種配色，相當大路。

菲林模式有Feel

今次Leica喺P9唔係掛名咁簡單，連拍攝功能都有參與，無論介面、字型甚至模擬快門聲都勁有Leica味道，倍感親切！新機除咗內置HDR、全景、光繪畫攝影、縮時攝影等基本功能，最方便係可於一般拍攝模式下轉為PRO專業模式，調校ISO、快門、曝光補償等設定。想影出Leica風格靚相建議開啟菲林模式，內裏提供標準、柔和及鮮艷3種風格，即時將相片對比度提高，色調帶有俗稱「奶味」嘅Leica味道。而黑白相片亦甚有水準，光暗層次分明，效果明顯比軟件後製嘅黑白相靚得多。

可以隨時將拍攝介面轉為專業模式，字型同Leica機一樣。

自家八核心處理器效能唔錯，跑分逾93,000分。

《健康》App可設定健身目標，提示用家做運動Keep Fit。

雙卡機玩指紋

拍攝功能固然夠強，新機連設計都唔輸蝕，機身採用鋁合金物料，加上2.5D弧面玻璃提升質感。規格方面，配備5.2吋全高清屏幕，並搭載Kirin 955八核心處理器、3,000mAh電池，而指紋辨識、中港3G/4G及雙卡雙待等功能亦齊備。還分為標準版及加強版兩個版本，前者內置3GB RAM/32GB ROM，後者用上4GB RAM/64GB ROM。值得一提，新機提供銀、灰、金3色，當中以帶有拋光效果嘅金色最浮誇搶眼，不過暫時屬加強版專屬配色，標準版只有銀、灰兩色選擇。