杜如科× o趙海珠堅離地喪踩SCOOTER

依家仲玩滑板車（Scooter）？Out唔Out啲呀！咪噓住，講緊嘅唔係細路周街踩嘅滑板車，而係啱啱引入香港嘅變種Scooter X580，其過癮之處在於將單車鏈設計融入車身，玩家喺踏板上前後「印印腳」便可提供動力，雙腳完全唔使落地，唔怪得o趙海珠、杜如科兩位網絡紅人試踩咗個幾鐘後都大嗌好玩，只不過雙腳攰到差啲抽筋啫！

「印印腳」四圍轆

雖然香港嘅滑板車熱潮早已減退，但今次可靠Scooter X580翻Hit！驟眼睇佢嘅外形同傳統滑板車差唔多，同樣有兩個轆加可摺式L形支架，不過Scooter X580加入咗單車元素，車底近前轆位置以一條車鏈連接後轆，手把仲有Brake煞車系統，究竟佢點玩嘅呢？其實有Kicking及Stepping兩種玩法，前者有啲似傳統滑板車，靠玩家單腳踩地提供動力；而後者先至係呢架車嘅精髓所在，Stepping模式時踏板會徐徐升高，玩家只要前後腳「堅離地」係咁踩，踏板就會好似搖搖板咁上下擺動，後轆車鏈隨之轉化成動力，玩得更自在！

踩板分享心得

聽落易上手，唔知實試會點呢？一於請網絡紅人譚淇淇和科林嚟挑戰！譚淇淇喺網上化身o趙海珠食嘢就叻，估唔到天生冇乜平衡感，試過「風火輪」、電動板都玩唔掂，用咗一段時間先搵到Scooter X580嘅平衡位。反而DJ科林（杜如科），幾分鐘就掌握到竅門，仲話只要夠膽踩落去畀力，就好易操控佢四圍轆。玩咗近一個鐘後，譚淇淇終於上手，而科林仲玩到左穿右插，練埋板上換腳花式添！他分享踩板心得：「喺Scooter要不斷郁雙腳，其實大小腿都幾攰，而且上半身要長期捉實手把，相當消耗體力，用嚟減肥都掂！」

兩種玩法 Kicking模式踏板維持水平狀態，玩法與傳統滑板車一樣，要靠單腳踩地產生動力。	Stepping模式升高踏板後，要好似搖搖板咁前後「印印腳」來帶動車鏈提供動力。	Scooter X580外觀與一般滑板車接近，提供黑、白、紅、藍4色選擇。售價：$1,399
備有車鏈連接後轆，Stepping模式嘅動力靠晒佢。	手把設有煞車系統，按下時會將後轆減速，唔會鎖死免得翻車。	車身設有3個Quick Release鎖扣，可隨時轉換模式。

摺合攜帶方便

廠商話8歲以上嘅小朋友已可玩Scooter X580，外國甚至試過有5歲細路都玩得掂，加上手把設有3款不同高度，迎合不同人士要求。攜帶方面，它一如傳統滑板車般可摺合收藏，摺埋時長度只有107cm，大概好似一把直骨遮咁長，加上約8kg（約17.6磅），擺喺車尾箱或手提拎住搭交通工具勁方便，賣千幾蚊都算合理。