一齊玩喇喂！合家歡復活節

3大歡度提案

「唔去公園，不如我哋去圖書館吖！」媽咪笑我咁鍾意去街，連圖書館都唔放過，其實茼茼最鍾意同爹哋媽咪一齊，去邊都無所謂，有得玩同食嘢就更加開心。媽咪話我大個女，畀我自己決定去邊度慶祝復活節，3個選擇都咁吸引，點揀好呢？

Choice 1：居酒屋食Brunch 玩遊戲做善事

剛過去的聖誕節，爹哋媽咪帶我去權八食過Brunch Buffet，餐廳喺3月27日下午再次舉辦兩場自助餐，我好想再去，因為自助餐桌上會源源不絕供應刺身壽司、卷物、沙律、燒物、炸物、串燒、天婦羅等，而蟹肉餅、燒雞翼同串燒豬頸肉都係我的最愛，食到停唔到口。每位幫襯的客人仲可以喺照燒雞扒、吉列日本豚、炭燒安格斯牛扒、西京燒比目魚4款主菜當中任揀一款，不過我最鍾意都係甜品專區供應的朱古力噴泉、豆沙銅鑼燒同雪糕吧，食到肚仔脹卜卜。、豆沙銅鑼燒同雪糕吧，食到肚仔脹卜卜。

室外首設攤位遊戲

食飽飽之後，侍應哥哥會送1枚代幣畀每位客人，只要走到餐廳室外的日式花園，就可以玩到多個特別為復活節而設的攤位遊戲，好似波波池尋蛋樂、繽紛復活蛋DIY、Face Painting、小型保齡球、拋圈圈等，玩得叻會得到糖果、朱古力等小禮物，參加填色比賽贏咗更會有餐飲現金券。而即場買代幣的款項將會全數捐畀公益金，玩之餘仲可以做善事幫其他人，助人為快樂之本，唔怪得今年復活節特別開心啦！

壽司、刺身和串燒一向是權八的招牌美食，平時散叫價錢都不便宜，現在卻在自助餐桌上源源不絕供應，相當抵食。	每位客人都可以自選一款燒烤主菜，西京燒比目魚是其中之一，比目魚肉質香滑，淋上西京汁更惹味醒胃，卻不減鮮甜魚香。	室外日式花園在復活節當天將會變成遊樂場，搭建了一系列攤位遊戲，波波池尋蛋樂就是其一。

權八居酒屋Brunch Buffet

日期：3月27日

時間：11:00am~1:00pm、1:30pm~4:00pm

價錢：成人$428~$498、小童$288~$328

查詢電話：2787 3688

Choice 2：迪士尼　尋找繽紛花蛋

去迪士尼一定要做足準備，我已經準備好隨時探米奇老鼠、史迪仔同Elsa了。媽咪話樂園由現在起到5月29日會舉辦「迪士尼花蛋節」，《玩轉腦朋友》的阿樂、阿愁、《雪姑七友》的7個小矮人、《海底奇兵》的MO仔、多莉，同埋《星球大戰》一班主角全部都會變身成超過70隻五顏六色的趣致花蛋，匿埋喺樂園裏面等大家慢慢發掘，唔知同爹哋媽咪參與「猜猜誰‧尋尋蛋」遊戲會搵到幾多隻花蛋呢？

迪士尼人物在花蛋節期間將會總動員化身成趣致彩蛋，遍布樂園每個角落，大小朋友都可以加入尋蛋行列，與可愛花蛋「集郵」留念。	米奇與9位好友紛紛換上以香港著名地標、購物、文化、美食及交通工具為主題的全新服飾，為大家帶來新鮮感。	除了新登場的醫神海鮮雞肉包、星球大戰漢堡包套餐之外，香港迪士尼樂園酒店的晶荷軒更首創了Tsum Tsum三色凍糕，咁可愛點捨得食落肚？

全新星級體驗

除咗搵花蛋之外，小熊Duffy、ShellieMay同最新登場的好友Gelatoni都會去到小鎮廣場歡迎賓客，米奇老鼠與他的9個朋友仔仲會換上充滿香港地道色彩的服飾，於美國小鎮大街同大家影相留念，諗起都開心！媽咪問我有冇興趣上堂參加星級體驗服務，唔制呀，點解去玩都要上堂？原來「課程」好吸引，包括「Tsum Tsum蛋糕教室」、「小公主化妝午宴」等，而「《小公主蘇菲亞》之旅」及「《星球大戰》預備班」更加係第一次推出，有得食有得玩又可以學整甜品，我梗係想同爹哋媽咪一齊參加啦！

迪士尼花蛋節

日期：即日起至5月29日

價錢：成人$539、小童$385、長者$100；全新星級體驗服務 $858（包1位成人及1位小童）

查詢電話：3550 3388

Choice 3：愉景灣 兩日一夜沙灘獵蛋

之前爹哋問我想唔想去愉景灣的大白灣沙灘掘蛋，有得搭船又可以去沙灘玩，茼茼當然想去啦！不過「沙灘獵蛋奇兵2016」門票一開售即被搶購一空，爹哋話如果我想玩，就一家人去香港愉景灣酒店住兩晚，因為酒店喺3月24至28日期間推出「復活節歡樂優惠套票」，$3,988起包兩位成人及1位11歲以下小朋友入住山景客房，還提供每天自助早餐、1晚復活節自助晚餐，以及愉景北商場「復活節繽Fun天地」遊戲券5張，最重要係有1張獵蛋活動入場券呢！

今年將會在3月25及26日舉行的「愉景灣沙灘獵蛋奇兵」是一年一度的大型活動，吸引無數家長搶購門票，變身成為獵蛋奇兵的小朋友屆時會齊齊去沙灘掘復活蛋。	酒店的復活節主題自助餐不但源源不絕供應法國麵包蟹、鱈場蟹腳等海鮮美食，同時又帶來了復活椰子菠蘿蛋糕、黑加侖子藍莓香草花形蛋糕等復活節主題甜品。	愉景北商場在3月25日至28日的中午12晚至下午6時30分舉行「復活節繽Fun天地」，帶來大力錘、深海樂園、我要做騎師、超級全疊打及We嘩！抓抓樂5個大型充氣遊戲。

品嘗合家歡自助餐

獵蛋活動會喺3月25及26日一連兩天舉行，小朋友到時齊齊變身成為獵蛋奇兵，掘出埋喺沙灘的復活蛋，參加者均會獲贈歡迎工具包，玩完仲有優異證書，還有機會贏取超過3萬份獎品。愉景北商場亦會於3月25日至28日舉行「復活節繽Fun天地」，每名獵蛋奇兵可獲2條遊戲手帶，憑手帶可以玩盡5款充氣遊戲。玩完肚仔餓再去酒店間Café bord de Mer & Lounge食復活節主題自助餐，餐廳特設Kids Fun天地，讓小朋友到露天海玥台DIY復活節甜品，一定好開心啫！

愉景灣酒店復活節歡樂優惠套票

日期：3月24日至28日　　

價錢：$3,988起（兩位成人及1位11歲以下小朋友）

復活節主題自助餐　

日期：3月25日至28日

自助午餐：成人$398、小童 $288

自助晚餐：成人$418、小童 $288

查詢電話：2295 8288

撰文：楊雅菁　

部分攝影：陳世昌