Hyundai Tucson韓式靚駕

近期有不少汽車品牌趁年尾推出優惠，老實講，好多車雖然減價，但都係未必人人負擔得起，倒不如精挑細選，揀符合實用、外形及價錢的車款。一直以來，韓國現代汽車（Hyundai）都在變，而且愈變愈好，例如今次詳測的Tucson，車廂空間充裕，用料十分講究，試車時刻意大力閂門，關門聲的「鋼水」似足歐洲車，更重要是車價$23萬有找，條件咁好，合晒用家要求。

Tucson操控穩定，日常出入游刃有餘。

空間闊落實用度高

筆者經常試車，型到爆炸的超跑揸過不少，呢類車即使中六合彩都未必買得到，還是返回現實不要離地到「月球」那麼遠吧！香港地養車講求實際，車價相宜最重要，若果是一家大細，三廂式或揭背房車未必夠用，因此SUV會是一個不錯的選擇。Tucson予人印象良好，置身後排三座位並不侷促，雙腿伸展度足，由於試駕車是Tucson Premium版本，後座是全真皮多幅式剪裁，乘坐感比日系車款更舒適。坐上駕駛席，儘管Tucson的車身較高，車頭面積亦大，但卻不會影響視線，而且幼A柱設計，盲點位較少，特別適合於繁忙的大都市內駕駛。雖然拍攝當日天色昏暗，但車廂透光度足，全靠車頂面積近三分之二的天窗，冬天去遊車河也合用。

車廂布局具歐洲Feel

既然坐得舒適，實用性又如何？Tucson擁有一個大尾箱，標準容量為513公升，放一架BB車絕對不成問題，就算好動一族擺放單車，只要摺合後座，1,503公升空間就可輕鬆收納了。車廂布局方面，只要細心留意，確實有多少歐洲車Feel，中控台採用T字式，不規則的冷氣風口，設計有多少趣怪，而嵌入式音響面板略為細小，下方冷氣系統按鍵，整體感覺統一，比起部分日系車款按鍵零散分布，Tucson就更見心思了。波棍台右邊備有按鍵，前方設有一個小型儲物格，若果在這個全黑色設計中，加入一些銀色飾板，觀感會較為醒神。三幅式多功能軚環是現今汽車必備，要留意按鍵較傾向中心點，就手與否見仁見智。

車身線條具有肌肉感，外形算搶眼。	尾箱標準空間513公升，相當見使。	整個中控台布局帶點歐洲車味道，感覺不錯。
三幅式軚環的按鍵靠向中心，使用時要留意。	雙圈式儀錶板沒太大特別，實用就好了。	大天窗令車廂的開揚感提高。

操控穩定車價相宜

Tucson搭載2公升自然吸氣引擎，可輸出最大馬力及扭力分別是155ps及19.6kgm扭力，配合六前速自動波附加減功能，起步反應屬預期理想，試車時走在直路，中段力量較強，但彎路時車速不宜太高，但整體而言，在公路上行駛感覺穩定，只要載着一家大細不踩盡油同人鬥車，理應沒有投訴。至於平均耗油量為7.9L/100km，按照目前油價計約$1.1走一公里，以如此大體積車身來說屬不錯了。綜合上述各點，舒適度及實用性，筆者會給予Tucson甚高分數，擁有歐洲車設計味道的外形又可以加分，現實一點是車價僅$228,000起，高級版本Premium亦只是$268,000，如此價錢相信只能買到易手歐洲車而已，所以準備買新車的朋友，Tucson或許是個很好的上車盤。

以廿多萬售價買到舒適實用SUV實屬不錯。	2公升自然吸氣引擎，最大馬力155ps。	波棍台旁備有Drive Mode兩種駕駛模式，包括ECO及Sport選擇。
小尾翼配上煞車燈，點綴了尾部觀感。	頭燈組線條銳利，一派歐洲車款式。	前排電動座椅的承托力十足又舒適。
後排座椅採用多幅式設計，空間感也不錯。	尾燈設計絕不平實，有線條有美感。