不應歧視女駕族
馬路上你最唔想遇到哪類型的駕駛者？問題一出立即引來身邊人喋喋不休，超速、左穿右插、Cut線唔打燈，未算嚴重喎。你後面冇車跟住，但隔籬線偏偏刻意加速夾硬Cut你線呢？立即觸動很多人的神經，覺得那人實在多此一舉。不過，一講到女司機，反應就更大，並且出現兩極化現象，男士們個個耍手擰頭話怕怕，女士們就話要平反。
編者太座屬「技驚四座」型，唔好以為係讚美說話，其實係技術嚇驚同車四位座上客！但編者不會以偏概全，反而認為女性的駕駛技術並無不妥，理由很簡單，只要問一問，每天所發生的交通意外中，是男駕駛者居多，還是女駕駛者呢？
平日見到的路上爭拗是男，抑或是女多呢？簡單兩問，已令班男士口呆了。還有巴士、小巴及的士均不乏女司機，技術又怎會唔得呢！或許大家在路上見過不少女士駕駛並不靈活及暢順，但她們只是阻你時間，而非出現嚴重事故影響行車，反而男士們要學懂忍讓的態度，做好自己，別歧視女性。今期介紹的Volkswagen Tiguan、Hyundai Tucson、平治A 250及Mazda6等，女性同樣適合，女士們即管駕駛吧。
話咁快到年尾，《汽車世界》特別號要在2016年才與大家見面，別忘記1月份有「超卓汽車大獎2015」公布及頒獎，屆時《汽車世界》特別號出版時間亦有所變動，敬請密切留意最新公布。
預祝大家聖誕快樂，新年進步！
撰文：朱志華