Polaroid Snap數碼即影即有雙重玩味

Zink相紙無墨打印

Polaroid可說是即影即有的代名詞，新推出的Polaroid Snap同樣以玩味行先，不過唔係用傳統寶麗來相紙，而係改以2×3吋Zink相紙作無墨打印。用家按下快門後，可將1,000萬像素影像儲存至記憶卡，同時打印成即影即有相片，整個過程約需20秒。雖然實際印出嚟張相唔算好靚，但即影即有勝在夠驚喜，就算用晒相紙，都可充當一般數碼相機使用。

內置3種拍攝模式

新機備有黑、白、藍、紅4色機身選擇，設計簡約易用，機頂設有彈出式光學觀景器，按一下即會彈出兼開機，惟光學觀景器同鏡頭嘅位置始終有少少分別，所以取景時不妨預留多啲空間。機身仲內置彩色、黑白和懷舊3種拍攝風格，仲可加入寶麗來的經典相框呢！

備有拍攝模式按鍵，支援彩色、黑白和懷舊3種風格。	支援microSD記憶卡，以記錄1,000萬像素相片。	配備F2.8大光圈定焦鏡頭，並有磁石鏡頭蓋。
頂部設有彈出式光學觀景器，一按即可開機。	Polaroid Snap備有黑、紅、白、藍4種顏色選擇，望落夠晒繽紛。	試相區 1,000萬像素相片的成像實淨又細膩，無論人或景的色彩都相當豐富；而利用Zink無墨打印相片，畫質只屬一般，相片還帶有幼細的橫紋，但勝在即影即有夠驚喜。

同場加映：Polaroid CUBE+植入Wi-Fi

同場另有Polaroid CUBE+運動攝錄機，備有黑、白、藍、紅4色方形機身選擇，支援防水濺和防震功能，適合帶到戶外影相拍片。它配備124度超廣角視野的F2.0大光圈鏡頭，既可拍攝800萬像素靜態相片，同時能攝錄1,440@30fps動態影像，配合Wi-Fi功能，支援以《Polaroid CUBE+》手機App實時遙距操控和傳送影像。

撰文：黎子豪

攝影：胡振文、蔡浩文

模特兒：Christy（Pure Models）

查詢電話：2524 5031