星戰別注筆電原力爆發

期待已久嘅新一集《星球大戰：原力覺醒》電影快將上映，估唔到除咗玩具和精品之外，連電腦Gadgets都有星戰特別版！講緊嘅係HP新推出嘅15.6吋Star Wars Special Edition Notebook，機身印有黑武士同帝國軍標誌，外觀型到爆，內裏仲預載大量原設畫集和電影圖檔，配以GeForce 940M顯示卡及B&O Play靚聲喇叭，用嚟翻煲《星球大戰》第1至6集就最啱。

Star Wars Special Edition Notebook 售價：$7,699（a）

戰損立體圖案

別以為特別版筆電只係將機身換吓顏色、印個Logo就算，Star Wars Special Edition Notebook設計概念來自黑武士，外殼加入立體圖案以營造戰損效果，又有黑武士和銀河帝國標誌剪影。打開機身可見紅色LED背光鍵盤，而手枕位印有白兵頭像，Touchpad更模擬X-Wing 的瞄準系統，轉軸處又以帝國軍文字印有Galactic Empire，連包裝盒的發泡膠都用上TIE Fighter戰機造型，誠意可嘉！

星戰百科全書

有外形之餘仲有內涵，新機除了於Win 10系統加入星戰主題布景，不少細位都經過微調，如「資源回收筒」以Death Star代表，當用家清空垃圾時它會變成爛模樣；另可喚出R2-D2介紹機體設定，甚至重現投射公主一幕。用家還可利用「Star Wars Command Center」介面，揀選電影劇照變換桌布等，或者將R2-D2、BB-8等聲音變成筆電專屬音效。想回味《星球大戰》的話，仲可於「Library」重溫電子版小說、瀏覽1977年原版彩色漫畫，以及包括《星球大戰：原力覺醒》等電影Trailer，簡直係預載了一本星戰百科全書。

外殼印有黑武士和立體圖案，營造出戰損效果。	手枕位印有白兵圖案，Touchpad則模擬X-Wing瞄準系統。	機身左側備有DVD燒錄機、USB 3.0插口及SD卡槽。
從桌面選單可啟動R2-D2發聲，點擊其頭部還可投影出公主。	「Star Wars Command Center」可揀選電影劇照來轉換桌布或Screen Saver。	經「Marvel」可瀏覽當年首部《星球大戰》的彩色漫畫。

B&O Play靚聲

硬件規格方面，新機採用第6代Core i5-6200U處理器、8GB RAM及GeForce 940M顯示卡，配以15.6吋全高清屏幕，用來睇片或工作都綽綽有餘，最吸引是有埋B&O Play靚聲喇叭，作為影音筆電絕對收貨，以$7,699的售價相當親民。由即日起至明年1月17日買機，仲附送《星球大戰》限量版保護套及無線滑鼠，極之吸引。