Honda Civic Type R無懼單挑

本田（Honda）新一代Civic Type R喺年初日內瓦車展登場後，近日已運到香港，外觀唔使問阿貴都知囂張，仲要首配2.0公升Turbo偈，馬力爆升至驚人的310ps，聽見都引死人。廠方早前攞部車去紐布寧北環賽道測試，竟然造出7分50秒63的單圈成績，唔止成為當今最快圈速的量產頭驅（FF）車，好多身價數百萬元的跑車都唔係佢對手，係咪夠牙擦先？

Honda Civic Type R 售價：$556,800<br>今年配額已全數售罄，預計今年12月起陸續交車。

Honda Civic Type R 售價：$556,800
今年配額已全數售罄，預計今年12月起陸續交車。

英國製造倒銷日本

全新的Civic Type R在英國製造，並倒轉銷往日本，即係話今代車型喺日本叫做「進口車」，在本港出售的版本，同樣來自Honda位於英國Swindon的工廠。Civic Type R向來都惡形惡相，至今仍保留了呢股霸氣，見到隻大尾翼、紅底Honda廠徽同Brembo「鮑魚」已嚇得吓人。事實上，歷代Civic Type R在全球都有Die Hard Fans，相關車會更不計其數，Honda於2010年一度宣布停產時，還以為以8代Civic為基礎開發出來的Type R已是終結篇，幸好廠方最終收回成命，才有今日被譽為「Race Car For The Road」的全新Civic Type R。

六速手波轉檔利落

由EK9到EP3及FD2/FN2世代的Civic Type R，引擎都採用自然吸氣（NA）形式，發展至今日配上i-VTEC Turbo的FK2，性能完全是兩碼子的事，翻查資料，1997年EK9 Type R的馬力只有185ps，全新FK2 Type R已飆升至310ps，增加幅度達到驚人的67%！六前速手波屬標準配置，相信是熱血車迷那杯茶，波棍採用短行程設計，轉波過程利落，官方公布0~100km/h的時間只需5.7秒、極速可達270km/h，有一刻懷疑過，眼前真的是一台Civic嗎？雖然Civic Type R的性能如此強大，不過操控卻非常易上手，特別係離合器十分輕巧，開起來絲毫不感吃力。

電子顯示屏可顯示G力，甚至提供0~100km/h的加速計時功能。	引擎轉數計放在錶板正中間，一貫跑車常用的設計。	原廠採用19吋輪圈，前輪配上紅色Brembo四活塞制動卡鉗。
車尾裝上大型尾翼，惡到出面。	紅、黑雙色軚環營造出強烈對比，充滿戰鬥格。	六前速手波配合短行程波棍，轉波利落。

310ps頭驅攻彎準繩

試車當日，不難發現測試車落地冇幾耐已開晒胎，想必上幾手試車的朋友也想一揭新車的底牌。也許唔少人會覺得310ps的頭驅車應推頭推到爆，惟實情並非如此，反而轉向帖服且非常咬地，彎路極限很高，扭幾多都會跟住入，若非嚴重超速或操控失誤，亦不會輕易出亂子。而在+R Mode加持下，油門反應會更加敏銳，懸掛設定亦會趨向更運動化，駕駛樂趣將進一步飆升。

Civic Type R首次配上Turbo，馬力爆升至310ps。	排氣喉採用左右四出設計，盡顯跑車風格。	當啟動+R Mode，油門及懸掛設定都會趨向更運動化。
前座用上桶形設計，提供良好的包裹性。	錶板設有轉波提示燈，猶如駕駛落場賽車。