超高感光α7S II 4K黑夜之神

4K大行其道，唔少DV、相機甚至手機都標榜拍到4K片，不過喺日光日白拍得幾靚都好，換到室內或昏暗環境Noise即刻現形。Sony全新α7S II無反相機，於4K拍片功能之上，加入ISO 409,600超高感光度及五軸防震系統，夜晚手持拍片再冇難度，預計10月底正式上市。

Sonyα7S II

支援ISO 409,600

α7S II用上1,220萬像素全片幅感光元件，結合BIONZ X影像處理器，支援3,840×2,160解像度的4K拍片功能，傳輸率高達100Mbps，最重要是今次毋須外加儲存裝置，可將4K影片直接寫入記憶卡。另一特點是支援ISO 409,600，為了測試高感光度表現，廠方於發布會架設了一個黑箱裝置，在幾乎全黑環境下，使用高感光度能清晰見到內裏主體，就算去到ISO 51,200雜訊控制仍見不俗，唔似以前成個畫面都係Color Noise和雪花，值得一讚。

全方位五軸防震

超高感光度已經夠煞食，估唔到新機仲加入五軸防震系統，真正如虎添翼，此技術能偵測五軸震動並修正搖晃，對應4.5級快門補償，於夜間手持拍片有莫大幫助。此外，機身還備有S-Log3伽瑪設定，提供14級動態範圍，以便於高反差或背光環境攝錄，雖然小記睇落去成像有點偏灰，但無論高光或暗位的細節都得以重現，有利進行後期製作。

Sonyα7S II 售價：$21,990（淨機身）	發布當日廠方特別擺設黑箱裝置，模擬幾乎全黑環境，供在場人士測試新機的感光表現。	備有4K拍片選項，傳輸率高達100Mbps，影像精細。
感光度支援最高ISO 409,600，環境唔夠光都冇問題。	機背具有3吋122.9萬像素多角度屏幕，以便不同角度取景。

169點自動對焦

無論影相抑或拍片，對焦速度和精準度都係關鍵，新機擁有169點自動對焦點，拍片時的對焦速度差唔多係上代兩倍，就算於低至EV-4的昏暗環境，對焦依然準確無誤。唯一要彈是機身設計沒有太大變化，背面沿用3吋翻揭式屏幕，方便用家高低角度拍攝，另配備236萬像素電子觀景器，提供0.78倍放大率，加上塗有蔡司T*塗層減低反光，難怪取景清晰又明亮。

機頂備有模式轉盤、曝光補償轉盤和自訂鍵。	用上236萬像素電子觀景器，支援0.78倍放大率。	配備1,220萬像素全片幅感光元件，並提供五軸防震，以修正手震問題。
新機能將4K影像直接寫入SD卡，毋須像上代般加裝儲存裝置。