紅米Note 2 5.5吋平民旗艦

細個阿媽成日話「食米唔知米貴」，但原來「米」竟然可以好平，如小米新推出嘅紅米Note 2，延續紅米系列嘅超高性價比，水貨被炒高咗都只係賣千鬆啲港紙，卻有齊5.5吋全高清屏幕、八核心處理器、1,300萬像素鏡頭等旗艦規格，仲有乜投訴？

160g輕巧機身

上代紅米Note以平價大芒搶佔入門市場，不過機身設計笨重為用家詬病。第二代紅米Note 2作出大幅改良，雖然同樣採用5.5吋大芒，但機身體積及重量大幅縮減，厚度由9.45mm偷薄至8.25mm，重量更由185g減磅至160g，便攜性大大提升。背殼由上代拋光設計換成磨沙物料，手感更好之餘不易黏上指紋，令外觀望落更高貴。而且沿用可換式電池及支援microSD卡設計，着重實用性嘅用家一定讚好！

多工操作流暢

機身體積縮減，硬件反而大幅升級，如5.5吋屏幕由上代720p提升至1,080p全高清級數，同時換上MediaTek X10 2GHz八核心處理器及2GB RAM，運行Android 5.0作業系統及MIUI 6介面，多工操作流暢，小記試玩時發現待機有近900MB RAM可用，效能不俗。新機分別搭載500萬像素前置鏡頭及1,300萬像素後置鏡頭，前者加入高、中、低3級美顏效果，後者提供場景、全景、HDR及手動模式之外，備有12種濾鏡包括魚眼、鏡面、背景虛化等，實用與玩味兼備。

背殼換上磨沙物料，手感不俗兼唔易跣手。

機身厚度縮至8.25mm，配合160g重量，便攜性不俗。

電池容量為3,060mAh，打開背殼便可隨時更換。

兼容中港網絡

紅米Note 2早前於內地首賣，短短12小時便賣出80萬部，數字驚人！其實它主要分為兩個版本，最入門係「移動版」，官方定價799人民幣，不過網絡制式與香港不同；另一款為「雙網通版」，即係今次水貨到港版本，官網賣899人民幣，支援GSM、WCDMA、TD-SCDMA、TD-LTE、FDD-LTE制式，代表全面兼容中港3G及4G網絡，配合雙卡雙待，兼容性一流。美中不足係「移動版」提供黃、藍、粉紅等5種配色，但「雙網通版」暫時只得白色，好似保守咗啲喎！

支援雙卡雙待，兩個卡槽均支援microSIM卡。	內置多達12種濾鏡，而且可即時預覽特效。	於屏幕由下至上一掃便會彈出快捷功能表，可控制Wi-Fi、藍芽等開關。
備有「極簡模式」將功能圖示變大，適合長者使用。	《AnTuTu》跑分獲44,029分，得分超越HTC One M8、Galaxy S5等上代旗艦機。	後置鏡頭預設多個場景，Snapshot更簡單。